Конгода Эболадан вафот этганлар сони 2,3 мингдан ошди
ASTANA. Kazinform — Конго Демократик Республикасида Эбола вирусининг тарқалиши оқибатида вафот этганлар сони 2325 нафарга етди, деб хабар беради The Guardian.
Конго Демократик Республикаси Миллий жамоат саломатлиги институти маълумотларига кўра, касалликнинг тасдиқланган ҳолатлари сони 4945 тага етган. Фақат сўнгги бир суткада яна 101 та ҳолат аниқланган.
Инфекция мамлакатдаги 26 провинциянинг олтитасига тарқалган. Касалликнинг аксарият ҳолатлари мамлакатнинг шимоли-шарқий ҳудудларида қайд этилган. Инфекция биринчи бор аниқланган Итури провинциясида 3400 дан ортиқ ҳолат қайд этилган.
Жаҳон соғлиқни сақлаш ташкилоти баҳолашича, ҳозирги инфекция аввал қайд этилган барча Эбола эпидемияларига қараганда тезроқ тарқалмоқда. Уч ойга етмаган вақт ичида икки мингдан ортиқ киши вафот этди. Таққослаш учун, 2014-2016 йилларда Ғарбий Африкада юз берган йирик эпидемия даврида қурбонлар сони беш ойга яқин вақт ичида минг нафарга етган.
Ҳозирги инфекция тарқалишига Бундибуджио вирусининг кам учрайдиган штамми сабаб бўлмоқда. Ҳозирча унга қарши тасдиқланган вакцина ёки махсус даволаш усули мавжуд эмас. Конго Демократик Республикасида эҳтимолий икки дори воситасининг клиник синовлари бошланди. Шунингдек, иккита вакцина ҳам синовдан ўтказилмоқда.
Мавжуд маълумотларга кўра, тахминан минг нафар бемор соғайиб чиққан. Яна 730 киши тиббий муассасаларда ёки изоляция шароитида даволанмоқда.
Инфекция тарқалишига қарши курашни беморларнинг тиббий ёрдамга кеч мурожаат қилиши, инфратузилманинг етарлича ривожланмагани ва тиббий муассасаларга қилинган ҳужумлар қийинлаштиряпти. Жаҳон соғлиқни сақлаш ташкилоти маълумотларига кўра, беморларнинг 70 фоиздан ортиғи тиббий марказлардан ташқарида вафот этяпти.
