Қирғизистон—Тожикистон чегарасида яна отишма содир бўлди

BISHKEK. Kazinform - Қирғизистон ва Тожикистон чегарачилари ўртасида яна отишма содир бўлди, ҳодиса оқибатида бир нафар қирғиз ҳарбийси яраланган. Бу ҳақда Қирғизистон Миллий хавфсизлик давлат қўмитасининг чегара хизмати ахборотига таяниб, «РБК» маълум қилган, деб хабар беради Kazinform.

«2022 йил 12 апрель куни қирғиз-тожик давлат чегарасида қуролли низо содир бўлди. Қирғизистон чегарачилар наряди Боткен вилоятининг Селкан Лейлек тумани ҳудудида хизматни ўтаётган вақтда ушбу ерга яқин жойда тожик чегарачилари пайдо бўлган, улар ҳамкасбларини кўрган бўлишига қарамай давлат чегарасининг шартли чизиғи томон ҳаракатни давом эттирган. Тожикистон аскарлари Қирғизистон чегарачиларининг тўхташ ва чегара чизиғидан узоқлашиш бўйича талабини писанд қилмаган, чегарани бузиб, Қирғизистон ҳудудида 20 метр масофа ичкарига кирган», — дейилади Қирғизистон Миллий хавфсизлик давлат қўмитаси чегара хизматининг хабарида.

Қирғизистон томони тожик чегарачиларининг мамлакат ичкарисига янада ичкарироқ киришини олдини олиш мақсадида уларга қарата огоҳлантириш тарзида ўт очган. Тожикистон чегарачилари бунга жавобан қирғиз аскарларига ўқ узган. Чегара хизмати маълумотига кўра, ҳодиса оқибатида тожикистонлик ҳарбий яраланган.

Кейинчалик Қирғизистон чегара хизмати «24.kg» нашрига яна такрорий отишма юз бергани ва у 30 дақиқа давом этганини маълум қилган. Тожик томони Қирғизистоннинг Достук қишлоғини миномётлардан ўққа тутган.

Тожикистон ҳукумати ҳодиса юзасидан расмий изоҳ бермаган.