Қирғизистон ноқонуний миграцияга қарши курашни кучайтирди
ASTANА. Кazinform - Қозоғистоннинг Кazinform агентлиги мухбирининг хабар беришича, ноқонуний миграцияга қарши кураш доирасида Қирғизистонда 10 июндан кейин барча ҳуқуқ-тартибот идоралари иштирокида “Нолегал” операцияси бошланади. Шу муносабат билан хорижликларга мамлакатдаги мақомини қонунийлаштириш ёки мамлакатни тарк этиш тавсия этилди.
Қирғиз Республикаси Миллий хавфсизлик давлат қўмитаси (МХДҚ) маълумотларига кўра, мамлакатда 5 мингга яқин ноқонуний мигрант бор. Жорий йил бошидан буён Қирғизистонга 61 минг сайёҳ, 30 минг талаба, 12 минг расмий меҳнат муҳожири ва бошқа тоифадаги 10 минг хорижий фуқаролар ташриф буюрди.
— Кўплаб хорижликлар ва уларнинг ҳомийлари киришнинг соддалаштирилган тартибини суиистеъмол қилишмоқда. Улар Қирғизистонга сайёҳ ёки талаба сифатида келади ва аслида ноқонуний меҳнат билан шуғулланади. Иш берувчилар чет элликларни давлат божини тўлашдан бўйин товлаш учун ўз вақтида визаси узайтирилмасдан ишга олади, бу миграция қонунчилигини бузиш ҳисобланади, — дея хабар беради МХДҚ.
Мамлакатга ноқонуний меҳнат муҳожирларининг оммавий кириб келишининг олдини олиш, миграция рухсатномаларини бериш ва расмийлаштиришда коррупцияга чек қўйиш, миграция оқимларини тартибга солиш ва такомиллаштириш мақсадида Қирғиз Республикаси Президентининг 2020 йил 21 январдан бошлаб “Қирғиз Республикасида миграция жараёнларини оптималлаштириш чора-тадбирлари тўғрисида”ги фармони амалга оширилмоқда.
Мазкур фармонга кўра, миграция қонунчилигини бузган ҳолда Қирғизистонда бўлган барча чет эл фуқаролари 2025 йилнинг 10 июнига қадар ўз мақомини қонунийлаштириши ёки мамлакатни тарк этиши шарт.
Аввалроқ чет эл фуқаролари Қирғизистонда ноқонуний миграция уюштираётгани хабар қилинган эди. 2024 йил 5 сентябрдан бошлаб хорижий фуқароларни визасиз режим билан рўйхатга олишнинг янги тартиби кучга кирди.Бундан ташқари, олий таълим муассасалари ректорларининг хорижлик талабаларга нисбатан шахсий жавобгарлиги кучайтирилган эди.
Эслатиб ўтамиз, Қирғизистонда гиёҳванд моддалар билан боғлиқ жиноятлар учун жазо кучайтирилгани ҳақида хабар берган эдик.
