«ҚазТрансГаз» рембрендинг ўтказиб, «QazaqGaz»га айланди

NUR-SULTAN. Кazinform - Қозоғистон Республикаси Ҳукумати газ саноатини ривожлантириш бўйича комплекс режани тасдиқлади. Вазирлар Кабинети томонидан тасдиқланган режа бандларидан бири «ҚазТрансГаз» МК» АЖ номи ва логотипини «QazaqGaz» миллий газ компаниясига ўзгартириш эди, деб хабар беради Kazinform.

Ребрендинг нафақат компания номи ва логотипини ўзгартириш, балки ички бизнес жараёнларини ўзгартириш ва янги миллий газ компанияси брендини ташқи кўринишга келтириш бўйича комплекс чора-тадбирларни ҳам ўз ичига олади.

Қозоғистонда газ саноатига муносабат узоқ вақтдан бери қолдиқ принципи асосида баҳоланиб келинмоқда. Нефть нархи юқори бўлган бир пайтда давлат ва инвесторлар суюқ углеводородлар қазиб олишни кўпайтириш воситаси сифатида қўшма газдан фойдаланган ҳолда нефть конларини ўзлаштириб, «қора олтин» билан ишлашни афзал кўрдилар.

Сўнгги пайтларда глобал миқёсда газнинг роли сезиларли даражада ошди. Табиий газ, бошқа углеводородлар қаторида, қайта тикланадиган энергия манбаларининг ривожланиши билан кам углеродли иқтисодиётга ўтишни таъминлаб, анъанавий ёқилғиларни тобора кўпроқ алмаштирмоқда.

«QazaqGaz» миллий компанияси бутун мамлакат газ саноатини ривожлантиришнинг янги босқичини бошлайди. Келгусида комплекс режанинг амалга оширилиши муносабати билан компания стратегияси ички ва халқаро бозорларда янги позицияларни ўз ичига олади.

«QazaqGaz» номи ва янги савдо белгиси компания фаолияти йўналишини янада аниқроқ кўрсатиб турибди, аввалги ном ва логотип асосан фақат газ ташишни билдирган. Янги логотип компания фаолиятининг жорий йўналиши ва газ саноатининг замонавий характерига мос келади.

Логотипнинг асосий мазмуни – осмонга кўтарилган спираль – динамик ҳаракат ва жадал ривожланишни билдиради. Логотипнинг асоси бўлган олов тили қуёш тимсоли, хонадонга илиқлик ва фаровонлик олиб кирувчи олов – аждодлар эътиқодидаги покланиш белгисидир. Оловга муқаддас тимсол сифатида қараш туркий халқлар анъаналарида қадимдан мавжуд. Ушбу ёнаётган алангани ифодаловчи компания логотипидаги кўк ва яшил рангларнинг мавжудлиги бугунги кунда жаҳон трендига айланган табиий газнинг экологик жиҳатдан қулайлигидан далолат беради.

Янги бренд компаниянинг вақт синовидан ўтган барча устувор йўналишларини, жумладан эволюцион ривожланиш, кенг кўламли операциялар, барқарорлик ва ишончлиликни ифодалайди.

Шу билан бирга, газ саноатининг бой тарихини ҳеч қачон унутмаслик, бир асрдан ортиқ тарихга эга нефть-газ саноатида илғор тажрибалардан оқилона фойдаланиш «QazaqGaz» миллий компаниясининг асосий тамойилларидан биридир.

Шу муносабат билан «QazaqGaz» миллий компанияси ўз фаолиятида илм-фан ва техниканинг илғор ютуқлари ҳамда саноат технологиялари ва бизнес, менежментга замонавий ёндашувлардан фойдаланган ҳолда жадал ривожланишни мақсад қилган.