Қасим-Жомарт Тоқаев Қосши шаҳрини ривожлантириш режаси билан танишди
ASTANA. Kazinform – Президентга пойтахтга туташ жойлашган Қосши шаҳрининг инфратузилмасини ривожлантириш режаси тақдим этилди.
Қосши шаҳри ҳокими Гайдар Қасеновнинг сўзларига кўра, 2021 йилда аҳоли пунктига вилоят аҳамиятига эга шаҳар мақоми берилганидан кейин аҳоли сони 110 минг кишига етган.
Шаҳар бош режаси доирасида 1,5 миллион квадрат метр уй-жой ва 45 та ижтимоий соҳа объектларини қуриш режалаштирилган.
Кейинги икки йилда шаҳарда учта мактаб фойдаланишга топширилди. Яна бир мактаб қурилиши якунланиши арафасида. Яқин келажакда “Қулай мактаб” миллий лойиҳаси доирасида учта таълим маскани ва иккита болалар боғчаси қурилиши режалаштирилган.
Соғлиқни сақлаш соҳасида давлат-хусусий шериклик доирасида битта давлат поликлиникаси ва иккита клиника фаолият кўрсатмоқда.
Шаҳар ҳокими бугунги кунда хусусий сармоя ҳисобидан 300 ўринли кўп тармоқли вилоят шифохонаси, 1000 нафар ташриф буюрувчига мўлжалланган поликлиника биноси қурилаётгани ҳақида маълум қилди.
Янги шифохонада терапия, онкология, неврология ва туғруқ бўлимлари бўлади. Тиббиёт муассасаси нафақат Қосши, балки яқин атрофдаги туманлар аҳолисига ҳам хизмат кўрсатиши режалаштирилган.
Жорий йилнинг май ойида «Alan» жисмоний тарбия ва соғломлаштириш мажмуаси фойдаланишга топширилди. Мажмуада болалар ва катталар учун бассейн, жисмоний машқлар ва спорт заллари мавжуд.
Қосшиликлар манфаати учун келгуси йилда Оммавий маданият ва спорт марказида интерактив таълим бўлими, спорт зали, теннис, баскетбол, футбол, волейбол майдонлари, кинотеатр, кўргазмалар зали, кутубхона, маъруза зали, амфитеатр фойдаланишга топширилади.
Давлат раҳбари Қосши шаҳрида қурилиш ишлари жадал бошланганини инобатга олиб, вилоят ҳокимига аҳоли пунктида муҳандислик-коммунал инфратузилмани ривожлантириш ва газ билан таъминлаш масаласига алоҳида эътибор қаратиш бўйича топшириқлар берди.
