Қасим-Жомарт Тоқаев Иордания Подшоҳи билан музокаралар ўтказди
ASTANA. Kazinform – ҚР Президенти Қасим-Жомарт Тоқаев Иордания Подшоҳи Абдулла II бин Ал-Ҳусайн билан музокара ўтказди. Бу ҳақда Ақорда матбуот хизмати хабар берди.
Давлат раҳбари, аввало, Подшоҳ Абдулла II ни ҳокимият тепасига келганига чорак аср тўлиши билан табриклаб, Иордания халқининг юксалиши ва фаровонлиги ҳамда мамлакатнинг барқарор ривожланиши, халқаро майдондаги нуфузини оширишга қаратилган бунёдкорлик ташаббуслари муваффақиятли амалга ошишини тилади.
Қасим-Жомарт Тоқаев икки давлат ўртасидаги дўстлик ва ҳамкорликни мустаҳкамлашга қўшган ҳиссаси учун Иордания раҳбарига миннатдорлик билдирди. Президентнинг сўзларига кўра, Иордания халқаро ҳамжамият томонидан тинчлик ва барқарорликни сақлаш тарафдори сифатида тан олинган давлатдир.
“Ушбу ташрифдан кўзланган мақсад муносабатларимиз, дўстлик ва савдо-иқтисодий муносабатларимизга янги суръат бағишлашдан иборат. Ўйлайманки, бизда дунёда бўлаётган жараёнларга умумий нуқтаи назар ва баҳо бор. Шу билан бирга, сиёсий даражадаги ҳамкорлигимизни чуқурлаштириш ниятидамиз. Бизда аниқ режа бор. Ишончим комилки, яқин келажакда биз аниқ келишувларга эришамиз ва унинг ижобий натижаларини кўрамиз. Ҳамкорлигимиз доирасида тинмай ишлашга тайёрмиз. Биз Иорданияни дўст мамлакат деб биламиз. Икки давлатни боғлайдиган кўплаб жиҳатлар бор”, – деди Қасим-Жомарт Тоқаев.
Давлат раҳбарининг сўзларига кўра, бугун қабул қилинадиган Қўшма декларация ва келишувлар икки томонлама ва кўп томонлама кун тартибининг барча йўналишлари Қозоғистон-Иордания ҳамкорлигини оширишдан икки томон ҳам манфаатдор эканини англатади.
Иордания Подшоҳи Абдулла II Қозоғистон Президенти Қасим-Жомарт Тоқаевнинг ташрифи икки давлат ўртасидаги сиёсий, савдо-иқтисодий ва сармоявий алоқаларни янада кенгайтириш учун катта имконият яратишини таъкидлади.
“Сизни ва муҳтарам делегациянгизни Иорданияда қарши олганимдан хурсандман. Бугун иқтисодий муносабатларнинг тикланиши ва хусусий сектор учун кўплаб имкониятлар очилади. Бу жуда муҳим”, – деди Иордания Подшоҳи.
Музокаралар чоғида савдо, сармоя, саноат, қишлоқ хўжалиги, транспорт-логистика, туризм, энергетика, рақамлаштириш ва фармацевтика каби муҳим тармоқлардаги ўзаро манфаатли ҳамкорлик истиқболлари атрофлича муҳокама қилинди.
Икки давлат ўртасидаги маданий-гуманитар ҳамкорликни кенгайтиришга алоҳида эътибор қаратилди. Айни пайтда Қозоғистон тиббиёт таълим муассасаларида Иорданиянинг 300 га яқин фуқароси таҳсил олмоқда. Бундан ташқари, Давлат раҳбари ва Иордания Подшоҳи халқаро ва минтақавий хавфсизликнинг долзарб масалалари юзасидан фикр алмашди.
Учрашув якунида Президент Иордания Подшоҳини Қозоғистонга ташриф буюришни таклиф қилди.
Эслатиб ўтамиз, ҚР Президенти Иордания Ҳошимийлар Қироллигига расмий ташриф билан борди.
ҚР Президентини Ал-Ҳусайния саройида Подшоҳ Абдулла II бин ал-Ҳусайн ва валиаҳд шаҳзода Ал-Ҳусайн кутиб олди.
