Италия Сурияга 68 миллион евро миқдорида ёрдам ажратади

ROME. Kazinform - Маблағлар Суриядаги гуманитар лойиҳаларни молиялаштириш ва инфратузилмани тиклаш учун ажратилади, дея хабар беради Каzinform агентлиги мухбири.

Бу ёрдам Дамашқдаги ўтиш жараёнини қўллаб-қувватлаш учун жуда муҳим, деди Италия ташқи ишлар вазири Антонио Таяни парламент эшитувида.

Эслатиб ўтамиз, 2024 йил декабрида Сурияда собиқ президент Башар Асадни ҳокимиятдан ағдарган “Ҳайъат Таҳрир аш-Шом” исёнчи гуруҳи (ҲТШ, Қозоғистонда тақиқланган ташкилот – муҳаррир эслатмаси) ҳокимият тепасига келган эди.

— Дастлабки пакет касалхоналар ва соғлиқни сақлаш, инфратузилма ва озиқ-овқат таъминоти занжирларини мустаҳкамлаш соҳаларида инсонпарварлик ташаббуслари учун ажратилди. Яқин ҳафталарда ҳамкорликнинг янги лойиҳалари бошланади. Шунингдек, биз қайта қуришга қаратилган бизнес-форум ташкил этиш ниятидамиз, — деди Таяни.

Шу ойда Европа Иттифоқи бошчилигидаги конференцияда донорлар Суриянинг янги ҳукуматига қийин ўтиш даврида ёрдам бериш учун 5,8 миллиард евро ажратишга ваъда беришди.

Европа Иттифоқи давлатлари, шунингдек, Сурияга қарши бир қатор санкцияларни, жумладан, энергия, банк, транспорт ва реконструкция билан боғлиқ чекловларни бекор қилди.

Шу ойда Суриянинг янги ҳукумати мамлакатда ислом ҳуқуқининг марказий ролини сақлаб қолган конституциявий декларацияни эълон қилди.

Таяни ўшанда конституциявий декларация “ижобий қадам” эканлигини ва санкцияларнинг “аста-секин ва эҳтиёткорлик билан” юмшатилиши институционал консолидация ва иқтисодий тикланишни рағбатлантиришда давом этиши кераклигини айтган.

Эслатиб ўтамиз, Сурия президенти янги ҳукумат таркибини 29 март куни эълон қилади.

Муаллиф: Арсен Ўтешев