Исландиядаги вулқон: Лава уйларга етиб борди
Декабрдаги отилишидан кейин вулқон атрофида тўсиқлар қурилган эди. Бироқ Исландия метеорология идораси баъзи жойларда тўсиқлар бузилиб, лава шаҳарга етиб келганини, уйларнинг ёниб кетишига сабаб бўлганини маълум қилди.
Аввалги вулқон отилишидан кейин Гриндавикка қайтган аҳоли яна уйларини тарк этишга мажбур бўлди.
Огоҳлантириш даражаси "фавқулодда вазият" даражасига кўтарилди, бу одамларга, жамоаларга, мулкка ёки атроф-муҳитга мумкин бўлган зарарни билдиради.
Илмий журналист ва вулқонолог Робин Эндрюс портлашнинг оқибатлари нафас олишга қиналадиган одамлар учун "жуда муаммоли" бўлиши мумкинлиги ҳақида огоҳлантирди.
Ушбу портлаш Рейкьянес ярим оролида 2021 йилдан бери содир бўлган бешинчи портлаш бўлди.
Аввалроқ Исландиянинг жануби-ғарбий қисмида кучли вулқон отилиши бошлангани, расмийларнинг эвакуация зарурлиги ҳақидаги сўнгги қароридан бир неча соат ўтиб бошлангани хабар қилинганди.
