Интим суратларни тарқатаман: Чимкентлик қизни шантаж қилган Ўзбекистон фуқароси қўлга олинди

Чимкент шаҳар полиция департаментининг уюшган жиноятчиликка қарши курашиш бўлими ходимлари маҳаллий аҳолидан пул ундирган Ўзбекистон фуқаросини қўлга олди, деб хабар беради Kazinform.

Жабрланувчи қиз ижтимоий тармоқларда бир эркак билан танишиб, бир неча ой давомида хат алмашган. Кейинчалик гумонланувчи унинг ишончини қозонди ва унинг шахсий маълумотлари, фотосуратлари ва интим расмларига кириш ҳуқуқига эга бўлди. Кейинроқ бу суратларни қариндошларига “тарқатиб юбориш” билан таҳдид қилиб, пул талаб қилган.

Уюшган жиноятчиликка қарши кураш бошқармаси ходимлари томонидан ўтказилган махсус операция натижасида товламачи Атирауда қўлга олинди. У 34 ёшли Ўзбекистон фуқароси бўлиб чиқди.

“Полиция томонидан мазкур ҳолат юзасидан Жиноят кодексининг 194-моддаси “Товламачилик” бўйича тергов ҳаракатлари олиб борилмоқда. Ҳозирда гумонланувчининг шу каби бошқа жиноятларга алоқадорлиги текширилмоқда. Ички ишлар органлари ходимлари ижтимоий тармоқларда нотаниш шахслар билан шахсий мавзуларда хат алмашиш, шахсий хусусиятга эга бўлган сурат ва видеоларни сақлаш ва жўнатиш мумкин эмаслиги ҳақида огоҳлантирмоқда”, – дейилади Чимкент шаҳар ПД матбуот хизмати хабарида.