Хитойнинг яна бир мегаполиси миллиардерлар сони бўйича Нью-Йоркни ортда қолдирди

PEKIN. Kazinform – Хитой жанубидаги Гуандун провинциясидаги Шэньчжэнь шаҳри миллиардерлар сони бўйича Нью-Йоркни ортда қолдирди. Бу ҳақда Hurun Report тадқиқот институти дунёнинг энг бой миллиардерлари рейтингини эълон қилган ҳисоботида айтилади, деб хабар беради Kazinform мухбири.

Ҳисоботга кўра, бир йил ичида Шэньчжэннинг энг бой одамлари рўйхатига саккиз нафар миллиардер қўшилган ва мегаполисдаги уларнинг сони 113 нафарга етиб, Нью-Йоркни ортда қолдирган.

Дунёда энг кўп миллиардери бор шаҳарлар рўйхатини Хитой мегаполислари бошқаради. Охирги маълумотларга кўра, Пекин (144), Шанхай (121), Шэньчжэнь (113), Нью-Йорк (110) ва Лондонда (101) юздан ортиқ миллиардер туради.

Hurun Report нашрининг таъкидлашича, Шэньчжэнда миллиардерлар сонининг кўпайиши келгуси йилларда шаҳарга янада кўпроқ ёш тадбиркорларни жалб қилиш тенденциясига замин яратиши мумкин. Шэньчжэнь шаҳрининг юксалиши 1980 йилда континентал Хитойда «ислоҳот ва очиқлик» сиёсатининг бир қисми сифатида биринчи махсус иқтисодий зонага айлантирилиши билан боғлиқдир.

1979 йилдан 2021 йилгача Шэньчжэнь ялпи ички маҳсулоти 475 миллиард долларгача ўсди. Шаҳарда Хитойнинг энг йирик технология компаниялари, жумладан Huawei телекоммуникация гиганти ва Tencent интернет-конгломерати жойлашган.

Маҳаллий ҳокимият маълумотларига кўра, ўтган йили Шэньчжэнда 2500 та янги юқори технологияли компания ташкил этилган бўлиб, уларнинг умумий сони 17 мингтага етган.

Муаллиф: Смағулова Еркежан