Хавфсизлик Кенгаши: Президент Ҳукумат томонидан ишлаб чиқилган фавқулодда чоралар режасини маъқуллади

ASTANA. Каzinform – Давлат раҳбари Хавфсизлик Кенгашининг навбатдан ташқари йиғилишини ўтказди. Йиғилишда Президент Россия Федерациясидаги вазият юзасидан берган топшириқларининг амалий ижроси бўйича Бош вазир, Бош прокурор, Миллий хавфсизлик қўмитаси раиси, Мудофаа, Ички ишлар ва Ташқи ишлар вазирларининг ҳисоботларини тинглади, дея хабар беради Каzinform Ақордага таяниб.

Бу воқеа Россиянинг ички муаммоси бўлишига қарамай, мамлакат фуқароларини хавотирга солган. Қозоғистон ва Россияни дунёдаги энг узун чегара ажратиб туради.

Президент Россия Қозоғистоннинг стратегик ҳамкори эканини таъкидлади. Қасим-Жомарт Тоқаев Владимир Путин билан телефон орқали суҳбатда Россия ҳукумати конституциявий тартиб ўрнатиш ва фуқаролар хавфсизлигини таъминлаш чораларини қўллаб-қувватлашини эслатди.

Давлат раҳбари ҳарбий ҳаракатларни тўхтатиш тўғрисидаги келишувни олқишлади. Президент қонун устуворлиги тамойили ҳар қандай давлат, жумладан, Қозоғистоннинг ҳам ички сиёсатида асосий устувор йўналиш бўлиши, жамоат тартибини таъминлаш ва мамлакатни ижтимоий-иқтисодий ривожлантиришнинг асоси бўлиши кераклигини таъкидлади.

Йиғилишда мамлакат молиявий-иқтисодий барқарорлигини, фуқаролар хавфсизлигини таъминлаш зарурлиги таъкидланди. Президент барча идоралар раҳбарларига инқирозли вазиятда юзага келиши мумкин бўлган таҳдидларга қарши ҳаракат қилишга тайёр бўлишни топширди.

Хавфсизлик Кенгаши йиғилиши якунлари бўйича Давлат раҳбари Ҳукумат томонидан ишлаб чиқилган фавқулодда чоралар режасини маъқуллади.