Франциядаги президентлик сайлови: Макрон ва Ле Пен иккинчи турга ўтди

BRUSSELS-PARIS. Kazinform - Франциянинг амалдаги президенти Эммануэль Макрон Франция президенти сайловининг биринчи босқичида ўта ўнгчил номзод Марин Ле Пенни ортда қолдириб, биринчи ўринни эгаллаб турибди, дея хабар беради Kazinform мухбири.

Париж вақти билан соат 20:00да Францияда сайлов участкалари ёпилганидан сўнг дарҳол эълон қилинган Ipsos агентлиги социологик сўрови маълумотларига кўра, Э.Макрон 28,1 фоиз, М.Ле Пен эса 23,3 фоиз овоз тўплаган.

Эҳтимол, икки номзод энди икки ҳафтадан сўнг, 24 апрел куни иккинчи босқичда учрашади. Якуний расмий натижалар кечки пайт эълон қилиниши кутилмоқда.

Жорий президентлик сайловлари Франциянинг Бешинчи Республикасидаги ўн иккинчи сайловдир. Франция Президенти тўғридан-тўғри умумий овоз бериш йўли билан 5 йил муддатга сайланади.

Сайлов рўйхатида жами 12 нафар номзод кўрсатилган.

Муаллиф: Арнур Рахимбеков