Фоторепортаж: Бош муфтий ҳайит намозини ўқиди, юрт фаровонлиги учун дуо қилди
ASTANА. Кazinform — Жорий йилда Ҳайит намози Манғистау, Ғарбий Қозоғистон ва Атирау вилоятларида эрталаб соат 8:00да, Қизилўрда, Ақтўбе, Қўстанай ва Шимолий Қозоғистон вилоятларида соат 7:30да, бошқа вилоятларда эса соат 7:00да бошланди. Бугун соат 6:00 дан олдин ҳайит намозини ўқиш учун аҳоли Астана масжидларига оқиб кела бошлади
Қозоғистон мусулмонлари диний бошқармаси раиси Науризбай ҳожи Тағанули Республика пойтахти масжидида ҳайит намозини ўқиб, жамоатга ваъз ўқиди.
Бош муфтий жамоат аҳлини Рамазон ҳайити билан табриклаб, мусулмоннинг Рамазондан кейинги руҳий ҳолатига тўхталди.
— Яқиндагина биз Рамазон ойини интиқлик билан кутардик ва унга эсон-омон етиб олишимизни умид қилгандик, энди эса муқаддас Рамазон ойи ҳам ўз ниҳоясига етиб, ҳайит байрамига яқинлашиб қолди. Рамазон ойи ҳар йили бир марта келадиган, қалбимизни поклайдиган, нафсимизни тарбияловчи, тақводорликни сингдирувчи руҳий устоздир. Ушбу муқаддас ойда тўплаган маънавий озуқа йил давомида маънавий даражамизга таъсир қилиши керак. Ҳаммамиз ўтган Рамазон ойида рўза тутдик. Таровиҳ намозини, жамоат намозини ўқиш учун масжидга келдик. Садақаларимизни муҳтожларга бердик. Энди муаммо Рамазондан кейин ҳам мана шу руҳий ҳолатни йўқотмасликда, – деди ҚМДБ раиси.
Шундан сўнг, муфтий ҳазратлари жамоат билан ҳайит намозини ўқиб, юртимиз, еримиз ободлиги учун алоҳида дуо ўқидилар.
Ҳайит намозидан сўнг шаҳар аҳолиси Бош масжидга йиғилиб, миллий спорт турлари бўйича беллашишди. Хусусан, ёшлар “Қўл кураши”, “Арқон тортишув”, “Ошиқ отиш” каби миллий ўйинлар бўйича беллашди.
Бугун Бош масжидга ҳайит намозига келган шаҳарлик Ондасин Абенули юрт фаровонлиги ва мустақиллигимиз мустаҳкамланиши учун дуо қилганини айтди.
— Дуоларимиз, тилакларимиз ижобат бўлсин, қозоқ халқининг бирлиги мустаҳкамланиб, ҳамжиҳатлигимиз ортиб, иқтисодиётимиз янада кучайсин. Қозоғистоннинг кўк байроғи баланд ҳилпирасин. Ўсиб келаётган ёш авлод ўз она тилида тиниқ гапиришини, ўз урф-одатларини улуғлашини, юртимиз равнақига хизмат қилишини тилайман. Мен ҳар йили Рамазон ҳайити ва Қурбон ҳайити намозларида шундай дуо қиламан. Ёшларнинг иштиёқидан мамнунман, ёшларга розиман, — дейди у.
Бугун Давлат раҳбари Қасим-Жомарт Токқев Қозоғистон халқини байрам билан табриклади.
Эслатиб ўтамиз, бу йилги Рамазон ойининг биринчи куни 1 мартдан бошланди.
