Дунёда сармоя учун рақобат кучайди, ҳукумат ва ҳокимлар бунга эътибор қаратишлари керак - Тоқаев

ASTANA. Kazinform - Қасим-Жомарт Тоқаев Манғистау жамоатчилиги билан учрашувда Ақтау денгиз портининг имкониятлари ҳақида сўзлаб берди, дея хабар бермоқда Kazinform.

«Ақтау денгиз порти» махсус иқтисодий зонаси кенг имкониятлар яратмоқда. Бу вилоят сармоя жалб этиш, маҳсулот ишлаб чиқариш, солиқ тўлаш кўрсаткичлари бўйича республикадаги энг яхши учта вилоятдан бири ҳисобланади. Бунгача менга махсус иқтисодий зоналардаги бўш турган ер майдонларини инфратузилма билан таъминлаш вазифаси юклатилди. Биз бу ишни жонлантирамиз. Ҳукумат махсус иқтисодий зоналарнинг ишлаш муддатини узайтириши керак, деб ҳисоблайман. Қозоғистон хорижий шериклар билан сармоявий ҳамкорликни ривожлантирмоқда. Улардан бири «Яшил» водород ишлаб чиқариш ва тарқатиш маркази қурилиши лойиҳасидир»

, – деди Давлат раҳбари.

Унга кўра, ўтган ҳафта Европа Кенгаши Президенти Шарль Мишель Қозоғистонга расмий ташриф билан келганида, Қозоғистон ва «Германия-Швеция» компанияси ўртасида тегишли сармоявий битим имзоланди.

Инвестор Манғистау вилоятида «яшил» водород ишлаб чиқаришни йўлга қўйишни режалаштирмоқда.

«Шунингдек, 255 минг куб метр сувни тузсизлантириш қурилмаси ва 40 гигаватт қувватга эга қайта тикланадиган электр станциясини қуриш режалаштирилган. Ушбу лойиҳа амалга оширилса, қурилиш вақтида 3500, объект ишга тушганда эса 1800 доимий иш ўрни яратиш мумкин бўлади. Мутахассисларимизни ўқитамиз ва тайёрлаймиз. Тегишли инфратузилма қурилади. Инвестор ўзининг ижтимоий мажбуриятларини бажаради. Вилоят ривожига мураккаб ижтимоий-иқтисодий таъсир кўрсатадиган бундай лойиҳалар кўп бўлиши керак. Бугунги кунда бутун дунёда инвестициялар учун рақобат кучайган. Мамлакатимиз ўз салоҳиятидан тўлиқ фойдаланиши, сармоявий муҳитни яхшилашга қатъий киришиши керак. Қайта-қайта такрорлайман: ҳукумат ва ҳокимлар биргаликда бу масалага эътибор қаратишлари керак»

, - деди Давлат раҳбари.