Дмитрий Попко Мексикадаги турнирнинг 4-ракеткасини мағлуб этиб, ярим финалга чиқди

ASTANА. Кazinform — Қозоғистонлик теннисчи, дунёнинг 275-ракеткаси Дмитрий Попко Морелия (Мексика) челленжер турнирининг ярим финалига чиқди.

Қозоғистонлик спортчи чорак финалда жаҳон рейтингида 117-ўринни эгаллаб турган ва ушбу турнирнинг 4-ракеткаси аргентиналик Тьяго Агустин Тиранте билан тўқнаш келди.

Попко биринчи партияни шиддат билан бошлади – 6:1.

Иккинчи сетда қозоғистонлик теннисчи дарҳол брейк қилди ва 2:0 ҳисобида олдинга чиқиб олди. Ниҳоят, у ўйинни ғалаба билан якунлади - 6:4.

Бир соату 10 дақиқа давом этган учрашувда Дмитрий иккита эйс билан бирга бешта брейк-пойнтнинг учтасидан фойдаланди. Тиранте 3 та эйс билан чекланди.

Дмитрий Попко финалга чиқиш учун дунё рейтингида 204-ўринни эгаллаб турган франциялик Уго Греньега қарши баҳс олиб боради. У 219-ўринни эгаллаб турган австралиялик Бернард Томични 2:6, 7:6 (7:4), 6:2 ҳисобида мағлуб этди.

Эслатиб ўтамиз, Тимофей Скатов Испания турниридаги тўртинчи учрашувида ғалаба қозонгани ҳақида хабар берган эдик.