Динлар съездида аёлларнинг жамиятдаги роли биринчи марта муҳокама қилинди

None
NUR-SULTAN. Кazinform – Жаҳон ва анъанавий динлар етакчиларининг съездида илк бор аёлларнинг жамиятдаги ўрни муҳокама қилинди, деб хабар беради Кazinform мухбири.

Қозоғистон мусулмонлари диний бошқармаси раиси, Бош муфтий Науризбай ҳожи Тағанули «Замонавий жамият фаровонлиги ва барқарор ривожланишига хотин-қизларнинг ҳиссаси ва аёлларнинг ижтимоий мавқеини қўллаб-қувватлашда диний жамоаларнинг ўрни» бўлимига модераторлик қилди.

«Қозоқ халқида «Аёл бир қўли билан бешикни тебратса, иккинчи қўли билан дунёни тебратади» деган ибора бор. Бунинг ортида аёлнинг ҳар қандай кенг кўламли ишларга аралаша олиши ва катта натижаларга эришиш учун жуда кўп имкониятларга эга эканлигидан далолат берувчи маъно ётади. Зеро, жамият ва ҳатто дунё тараққиёти, турли соҳалардаги ютуқларида аёлларнинг ҳиссаси катта экани ҳақиқат. Исломда аёллар алоҳида мақомга эга. Эътиқод йўлидан борган халқимиз аёл ва қизларни эъзозлашнинг ўзига хос намунасини кўрсатган. Тарбияга келганда эса қизни қирқ уйдан ман қилган. Бу тақиқларнинг барчаси аёлнинг иймони ва ор-номусини, ғурур ва уятини ҳимоя қилади«

, - деди Бош муфтий Жаҳон ва анъанавий динлар етакчиларининг VII съездининг навбатдаги мажлисида.

Бош муфтийнинг таъкидлашича, Яратган Қуръони каримнинг «Нисо» сурасининг 19-оятида «Хотинларингиз билан яхши яшанг ва яхши муносабатда бўлинг», - деб буюрган.

Муҳтарам пайғамбаримиз Муҳаммад (с.а.в.) «Имон жиҳатидан энг комил мўминлар, энг яхши хулқли кишилардир», дедилар. Сизларнинг энг ҳурматлиларингиз ўз хотинлари ва болаларига яхши муомала қиладиганлардир. Сизларнинг орангизда оиласига энг кўп ғамхўрлик қилаётган менман», деб ўз сўзи ва ишлари билан ўрнак бўлди. Афсуски, бугунги дунёда хотин-қизларга товар сифатида қараш ёки сотиш учун фойдаланиш, уларга нисбатан зўравонлик, зўрлик билан уй хизматкори сифатида сақлаш, абортга мажбурлаш, фарзандли бўлиш бахтидан маҳрум қилиш каби муаммолар кўзга ташланади, - деди Н. Тағанули.

«Оила саломатлиги» халқаро журнали маълумотларига кўра, ана шундай тор қарашлар натижасида ҳар йили дунёда 75 миллиондан ортиқ аёл ўз иродасига қарши ҳомиладор бўлиб қолади ёки ҳомиладор бўлган 175 миллион аёлнинг 45 миллионида ҳомила тушиб қолади. Ҳар йили дунё бўйлаб 585 мингдан ортиқ аёл ҳомиладорлик билан боғлиқ асоратлар туфайли вафот этади.

«300 мингдан ортиқ аёл контрацептив воситалардан нотўғри фойдаланиш туфайли вафот этади. Таълим олиш ҳуқуқидан маҳрум бўлган, саводсизликдан азият чекаётган қизлар сони эса 600 миллиондан ошади. Бундай ҳайратланарли статистик маълумотлар биздан халқаро миқёсда ушбу ҳолатга эътибор беришни талаб қилади. Ҳурматли маърузачилар! Маърузаларингизда ушбу муаммоларга эътибор қаратиб, бу муаммодан чиқиш йўлини кўрсатишга ҳаракат қилишингизни сўраймиз», — деди Науризбай ҳожи Тағанули.

Эслатиб ўтамиз, бугун пойтахтда Жаҳон ва анъанавий динлар етакчиларининг VII съезди иккинчи кун бўлиб ўтмоқда. Куннинг иккинчи ярмида қурултой тантанали равишда ёпилади.

Муаллиф: Айжан Серикжанқизи

Сўнгги хабарлар
telegram