Давлат раҳбари Қасим-Жомарт Тоқаев Озарбайжон Президенти Илҳом Алиев билан учрашди
ASTANA. Kazinform – Қозоғистон Президенти Илҳом Алиевга ШҲТ саммитида фахрий меҳмон сифатида иштирок этгани учун миннатдорлик билдирди.
Давлат раҳбари Қозоғистон ва Озарбайжон ўртасидаги стратегик шериклик ва иттифоқчилик руҳида ривожланиб, янги мазмун билан тўлдирилиб бораётган кенг қамровли ҳамкорлик динамикасини юқори баҳолади.
“Боку ва Шушага қилган саёҳатимни доим эслайман. Бу, аслида, бурилиш нуқтаси, муҳим, тарихий саёҳат бўлди, десак муболаға бўлмайди. Музокаралар давомида биз қатор стратегик йўналишлар бўйича ҳамкорликни янада ривожлантиришга янги суръат бағишладик”, – деди Қозоғистон Президенти.
Икки давлат раҳбарлари сармоя, саноат, энергетика, транспорт ва логистика соҳаларида қўшма лойиҳаларни амалга ошириш масалаларини муҳокама қилдилар. Шу муносабат билан Транскаспий халқаро транспорт йўналишидан самарали фойдаланиш масаласига алоҳида эътибор қаратилди.
Илҳом Алиев Қасим-Жомарт Тоқаевга анъанавий ҳурмат учун миннатдорчилик билдирди ва Боку Астана билан давлатлараро муносабатларнинг барча йўналишларида икки томонлама ҳамкорликни янада мустаҳкамлашга қатъийлигини тасдиқлади.
Илҳом Алиев Қасим-Жомарт Тоқаевга Озарбайжон ва Арманистон ўртасидаги музокаралар жараёнидаги иштироки учун миннатдорчилик билдирди. Шунингдек, Қозоғистон жаҳон ҳамжамиятининг муносиб аъзоси сифатида нафақат минтақада, балки халқаро майдонда ҳам муҳим ўрин тутаётганини таъкидлади.
Суҳбат чоғида савдо-иқтисодий ва маданий-гуманитар ҳамкорликни янада чуқурлаштириш истиқболлари кўриб чиқилди. Шу билан бирга, халқаро ташкилотлар доирасидаги ҳамкорликни янада ривожлантириш масалалари юзасидан фикр алмашилди.
Учрашув якунида икки давлат раҳбарлари иштирокида “Самруқ-Қазна” АЖ ва Azerbaijan Investment Holding ўртасида қўшма инвестиция жамғармасини бошқариш бўйича шартнома имзоланди.
