Давлат раҳбари Энергетика вазири Ерлан Ақкенженовни қабул қилди

ASTANА. Кazinform - Қасим-Жомарт Тоқаевга мамлакат ёқилғи-энергетика комплекси ҳолати, асосий лойиҳаларни амалга оширишнинг бориши ва соҳани янада ривожлантириш режаси тўғрисида ахборот берилди.

Президентга мамлакатдаги нефтни қайта ишлаш заводларининг нормал ишлаши ҳақида маълумот берилди. Жорий йилда нефтни қайта ишлаш ҳажмини 17,6 миллион тоннага етказиш режалаштирилган. Вазир, шунингдек, нефтни қайта ишлашни 2040 йилгача ривожлантириш концепцияси ишлаб чиқилаётганини маълум қилди.

Ерлан Ақкенженов газ қазиб олиш, Қашаған, Қарашиғанақ конлари ва Жанаўзенда янги газни қайта ишлаш заводларини қуриш режасини тақдим этди. “Бейнеу – Бозой – Чимкент” магистрал газ қувурининг иккинчи линияси ва “Талдиқорған – Ушарал” газ қувурлари қурилиши давом этмоқда. Қасим-Жомарт Тоқаевга 26 гигаваттдан ортиқ қувватга эга янги авлод мажмуаларини ишга тушириш режалаштирилгани айтилди. Бу 2035 йилгача ички талабни қондириш мақсадида амалга оширилмоқда.

Учрашув якунида Президент ёқилғи-энергетика тармоғини янада ривожлантириш бўйича қатор топшириқлар берди. Давлат раҳбари нефть-газ, нефть-газ кимёси, электроэнергетика соҳаларида режалаштирилган инфратузилма лойиҳаларини ўз вақтида ва сифатли амалга ошириш муҳимлигини таъкидлади. Қасим-Жомарт Тоқаев мамлакатнинг энергетик хавфсизлигини таъминлаш, аҳоли ва саноат объектларини энергия манбалари билан доимий таъминлашга эътибор қаратиш зарур, деб ҳисоблайди. Президент инвестиция муҳитини яхшилаш, геология-қидирув ишларига стратегик инвесторларни жалб этиш бўйича комплекс чора-тадбирларни амалга ошириш вазифасини топширди.

Эслатиб ўтамиз, аввалроқ Саноат вазири Президентни вазирликнинг истиқболдаги режалари билан таништиргани ҳақида хабар берган эдик.