Чилида мотам эълон қилинди

Чилининг собиқ президенти 74 ёшли Себастьян Пиньера вертолёт ҳалокатида вафот этди. Бу ҳақда Чили Ички ишлар вазирлиги раҳбари Каролина Тоа ўзининг X’даги расмий саҳифасида маълум қилди, деб хабар беради Каzinform.

Чилининг айни дамдаги Президенти Габриэль Борич мамлакатда миллий мотам эълон қилди ва дафн маросимини давлат миқёсида ўтказишни буюрди.

"Мен Чилининг икки марта сайланган президенти хотирасига уч кунлик мотам эълон қилдим. Ташқи ишлар вазири Альберто Ван Клаверенни дафн маросими қўмитасига масъул этиб тайинладим", – деди мамлакат президенти ўз мурожаатида.

Қайд этилишича, ҳалокат Лаго Ранко коммунаси ҳудудида юз берган. Вертолётни ўзи бошқараётган Пиньера кучли ёмғир пайтида бошқарувни йўқотган, оқибатда у Ранко кўлига қулаган. Вертолётда собиқ давлат раҳбаридан ташқари яна уч киши бўлган, улар омон қолган ва қирғоққа чиқиб олишга муваффақ бўлган. Фавқулодда хизматлар Себастьян Пиньеранинг жасадини сувдан топишган.

Маълумот учун, Консерватор Себастьян Пиньера икки марта, 2010-2014 ва 2018-2022 йилларда Чили президенти бўлган.