Буғдой экиш қисқаради ва юқори рентабелли экин майдонлари кўпаяди – ҚР ҚХВ

ASTANА. Кazinform – Жорий йилда Қозоғистонда қишлоқ хўжалиги экинлари майдонлари ўтган йилга нисбатан 518 минг гектарга кўпаяди. Бу ҳақда ҚР Қишлоқ хўжалиги вазирлиги раҳбари Айдарбек Сапаров Ҳукумат йиғилишида маълум қилди.

— Қишлоқ хўжалиги ялпи маҳсулотини икки баравар ошириш бўйича “Йўл харитаси”га мувофиқ, бу йил ҳам экин майдонларини диверсификация қилиш ишлари давом эттирилади. Барча кўрсаткичлар ҳокимликларга етказилган. Умуман олганда, 23,8 миллион гектар майдонга экин экиш режалаштирилган. Бу ўтган йилга нисбатан 518 минг гектарга кўп, — деди у.

Унга кўра, жорий йилда диверсификация дастури 1 миллион гектарга яқин ерни қамраб олади.

— Шундай қилиб, юқори рентабелли экинлар майдони 750 минг гектарга, жумладан, мойли экинлар 365 минг гектарга, ем-хашак экинлари 184 минг гектарга, арпа 114 минг гектарга, гречка 41,5 минг гектарга, картошка 115 минг гектарга кўпаяди. Айни пайтда буғдой монокультурасидан бошқа экинга ўтиш бўйича кенг кўламли ишлар олиб борилмоқда. Охирги 2 йилда буғдой майдони 730 минг гектарга, жумладан, жорий йилда 159 минг гектарга камайди, — деди вазир.

Вазирнинг айтишича, айни пайтда ёғли ва дуккакли экинлар ҳам ички, ҳам ташқи бозорда харидоргир бўлиб, нархлари барқарор юқори даражада.

– Масалан, буғдойнинг ўртача нархи бир тоннаси учун 65-70 минг тенге бўлса, зиғир, рапс каби экспортбоп экинлар нархи 200 минг тенгега етади ва ундан ҳам юқори, – дейди Айдарбек Сапаров.

Эслатиб ўтамиз, Қозоғистон 2025 йилда Грузияга 80 минг тонна буғдой экспорт қилади.