Британия ташқи ишлар вазири: Ҳурмуз бўғозини тўсиш хатодир
ASTANА. Кazinform — Буюк Британия ташқи ишлар вазири Дэвид Ламми Теҳронни Ҳурмуз бўғози масаласи бўйича музокаралар столига қайтишга чақирди, деб хабар беради Аnadolu агентлиги.
BBC Radio 4-каналининг «Today» эрталабки дастурида сўзлаган Ламми АҚШнинг Эрон ядровий иншоотларига зарбалари ҳақида ўз фикрларини билдирди.
Унинг сўзларига кўра, Эроннинг минтақадаги АҚШ базаларига ҳужумига жавоби ёки Ҳурмуз бўғозидаги муҳим юк ташиш йўлаги ёпилиши “ҳалокатли хато” бўлади.
— Ҳозир минтақадаги АҚШ ҳарбий базаларига ҳужум қилиш катта, тузатиб бўлмайдиган хато бўларди. Ҳарбийларимиз ҳам у ерда жойлашган. Бу бахтсиз ҳодисага олиб келиши мумкин. Ҳурмуз бўғозини ёпиш ҳам катта хатодир, — деди вазир.
Ламмининг айтишича, у Эрон ташқи ишлар вазири Аббос Арақчидан Эрон раҳбариятининг ядровий дастури бўйича инқирозни ҳал этиш йўлини жиддий ўйлаб кўриши ҳақидаги талабни етказишни сўраган.
— Улар энди ўзларига тақдим этилган инқироздан чиқиш йўлини жиддий ўйлаб кўришлари керак, — деди Ламми.
АҚШ зарбалари Эроннинг ядровий дастурини йиллар давомида орқага суриши мумкин
Вазирнинг айтишича, Ғарб иттифоқчилари ҳали ҳам АҚШ зарбалари оқибатларини ўрганмоқда, бироқ Эрон ҳали ҳам уран захираларини бойитган бўлиши мумкин деган тахминлар бор. Шунга қарамай, Ламмининг ҳисоб-китобига кўра, АҚШнинг ҳаракатлари "Эроннинг ядровий дастурини бир неча йилга орқага қайтариши" мумкин.
Ҳаво ҳужумларининг қонунийлиги ҳақидаги саволга Ламми жавоб беришдан бош тортди ва бу масала Вашингтон юрисдикциясида эканлигини айтди.
— Эроннинг деэскалация йўлидан бориши учун ҳали ҳам имконият бор, — деди вазир.
Шунингдек, у ўтган ҳафта Женевада Эрон ва Европа “учлиги” (Франция, Германия, Буюк Британия) ўртасида бўлиб ўтган музокаралар “жуда мураккаб” бўлганини эслатди.
— Ҳамма Теҳронни Европа Иттифоқи ва АҚШ билан музокараларга жиддий ёндашишга чақирмоқда, — дея хулоса қилди Ламми.
Эслатиб ўтамиз, аввалроқ Туркия Ҳурмуз бўғози ёпилган тақдирда фойдаланиш учун муқобил вариантлар устида ишлаётгани ҳақида хабар берган эдик.
