Болқонда ҳаддан ташқари жазирама шароитида ўрмон ёнғинларига қарши кураш олиб борилмоқда

ASTANA. Kazinform - Аномал иссиқ об-ҳаво ва қурғоқчилик шароитида Болқонда ўрмон ёнғинлари билан кураш олиб борилмоқда. Болгария ва Шимолий Македония ЕИдан ёрдам сўради, дея хабар беради Кazinform агентлиги euronews.comга таяниб.

Болгарияда ҳарорат +40 гача бўлган ғайритабиий жазирама ҳукмронлик қилмоқда. Мамлакат жануби ва жануби-ғарбида ўрмонлар ёнмоқда. Ёнғин аллақачон кенг ҳудудларни қамраб олган.

Бош вазир Стара Загора жабрланган ҳудудида аҳоли ва кўнгиллилар билан учрашди. У фуқароларни "жуда эҳтиёт бўлишга" чақирди, чунки "кичик хато" ёнғинга олиб келиши мумкин.

- Айни пайтда вазият назорат остида. Давлат, агар керак бўлса, тиклаш ва ёрдам кўрсатиш бўйича идоралараро комиссия орқали қўшимча ёрдам беришга тайёр. Чехия ва Руминиядан бизга ёрдам беришларига кафолат бор, — деди Болгария Бош вазири Димитар Главчев.

Шимолий Македонияда 10 та фаол ёнғин мавжуд. Айниқса, мамлакат марказида, Штип ва Неготино жамоаларининг тоғли ҳудудларида вазият оғир. У ерда юзлаб гектар қарағай ўрмонига ёнғин таҳдид солмоқда. Ҳозирча уни назорат остига олишнинг имкони бўлмади.

Шимолий Македония ҳукумати Европа Иттифоқидан фуқаролик фавқулодда вазиятлардан ҳимоя қилиш механизмини фаоллаштиришни сўради. Туркия, Черногория, Сербия ва Словениядан самолёт ва вертолётлар аллақачон ёнғиндан жабрланган ҳудудга етиб борган.