Бокуда “Made in Turon” халқаро кўргазмаси бўлиб ўтади

Жорий йилнинг 29-30 апрель кунлари Озарбайжон пойтахти Боку шаҳрида “Made in Turon” халқаро кўргазмаси ташкил этилади, деб ёзади ЎзА.

“Ўзтўқимачиликсаноат” уюшмаси ахборот хизматининг хабар беришича, ушбу тадбирда тўқимачилик саноатида савдо ва ҳамкорлик алоқаларини ривожлантириш, тадбиркорлар ўртасида шерикликни кенгайтириш ҳамда истиқболли лойиҳалар муҳокама қилинади.

Кўргазма туркий дунё тўқимачилик мероси ва замонавий йўналишларини бирлаштириш баробарида соҳадаги сўнгги инновацияларни намойиш этади. Унда Ўзбекистон, Қозоғистон, Туркия, Туркманистон, Қирғизистон, Россия, Покистон, Ҳиндистон, Саудия Арабистони, Қатар, Кувайт, Венгрия, Япония каби давлатлардан тўқимачилик соҳаси мутахассислари, дизайнерлар ва тадбиркорлар қатнашади.

Тадбир доирасида юқори мансабдор шахслар ва етакчи экспертларнинг чиқишлари, тўқимачилик брендларининг тақдимотлари, B2B учрашувлари ва бизнес музокаралари, давра суҳбатлари ҳамда тематик конференциялар ташкил этилади. Бундан ташқари, эксклюзив бизнес экскурсиялар орқали иштирокчилар соҳадаги илғор тажрибалар билан яқиндан танишиш имкониятига эга бўладилар.