Биз дунё давлатларини Қозоғистондан ўрнак олишга чақирамиз – Жаҳон Ислом лигаси

Жаҳон Ислом лигаси Бош котиби ўринбосари Абдураҳмон Абдулла Ал-Заид дунё давлатларини Қозоғистондан ўрнак олиб, ядро қуролидан воз кечишга чақирди, деб хабар беради Kazinform агентлиги.

“Биз барчамиз қайта-қайта учрашган ушбу замонавий шаҳарда дунё тинчлигига бўлган интилишимизни бир неча бор ойдинлаштирдик. Ижтимоий тотувликка эришиш истагимиз фикрларимиздаги фарқларимизни енгиб чиқади. Умумий инсоний қадриятларимизни мустаҳкамлаш ва уларни самарали лойиҳаларга айлантириш учун кўплаб замонавий муаммолар бўйича ўз нуқтаи назаримиз ва позицияларимизни бирлаштиришимиз керак”, - деди у Жаҳон ва анъанавий динлар етакчилари қурултойи Котибиятининг ХХІ йиғилишида.

Шу муносабат билан диний етакчи дунёда одамлар ўлимига сабаб бўлаётган қон тўкилишини тўхтатишга чақирди.

“Биз бузғунчи қуроллардан ихтиёрий воз кечган Қозоғистон Республикасидан ўрнак олиб, дунё давлатларини ядровий салоҳиятидан халос бўлишга чақирамиз. Қозоғистон қурол ўрнига низоларни ҳал қилиш воситаси сифатида мулоқот ва ўзаро тушунишни танламоқда. Бунинг учун биз Қозоғистон Ҳукумати ва халқига самимий миннатдорчилигимизни билдирамиз”, — деди Абдураҳмон Абдулла Ал-Заид.