Бангладешда 18 миллион киши иш қидирмоқда

ASTANA. Kazinform – Бугунги кунда Бангладешда ёшларни иш билан таъминлаш жиддий муаммо ҳисобланади. Тахминан 18 миллион киши фаол иш қидирмоқда, деб хабар беради Kazinform агентлигининг халқаро шарҳловчиси.

Экспертнинг сўзларига кўра, Бангладешда 47 та давлат ёки субсидияланган университетлар, шунингдек, 105 та хусусий университет ва 2 та халқаро университет мавжуд. Мамлакатда талабалар сони 2,8 миллионга яқин. Бангладеш Миллий университетида ўқиш тўлови йилига атиги $9. Бироқ, чет элликлар учун бу тахминан 1 минг доллар туради.

“Умуман олганда, Бангладешда 18 миллионга яқин одам иш қидирмоқда. Ёшларнинг 40 фоизга яқини ишсиз. Аммо талабалар учун ишсизлик ўзига хос хусусиятларга эга. Оддий шароитларда олий таълим кучли кадрларни танлашда ижтимоий босқич ҳисобланади. Аммо мамлакатдаги 150 та олий ўқув юртида 2,8 миллион талаба таҳсил олаётган бўлса, уларнинг ҳаммасига мос иш бўлмаслиги мумкин. Қолаверса, давлатда ишлаётганларнинг 30 фоизи муайян ижтимоий гуруҳлар вакиллари учун ажратилган”, – дейди халқаро кузатувчи.

Эслатиб ўтамиз, Бангладешда талабаларнинг оммавий норозилиги июнь ойи охирида бошланган эди. Бу мамлакатни 2009 йилдан бери бошқариб келаётган Бош вазир Шайх Хасинанинг истеъфога чиқишига сабаб бўлди. Кейинроқ Хасина Буюк Британиядан бошпана сўрагани маълум бўлди.

5 августда мамлакатда муваққат ҳукумат тузилиб, парламент тарқатиб юборилди. Бир кундан кейин Нобель мукофоти лауреати профессор Муҳаммад Юнус муваққат ҳукуматни унинг бош маслаҳатчиси сифатида бошқаришга рози бўлди.