Баҳорги экиш ишлари: қишлоқ хўжалиги техникалари 99 фоизга тайёр
ASTANA. Kazinform — Қишлоқ хўжалиги техникаси бўлажак экиш ишларига 99 фоиз тайёр.
Бу ҳақда Ҳукумат йиғилишида ҚР Қишлоқ хўжалиги вазири Айдарбек Сапаров маълум қилди.
«Қишлоқ хўжалиги техникаси бўйича 139 мингта трактор, қарийб 5,6 минг дона юқори маҳсулдор экиш комплекслари, 71 мингта уруғ сепувчи, 141 минг дона тупроққа ишлов берувчи асбоб-ускуналар мавжуд. Ҳудудлардан олинган маълумотларга кўра, техникаларнинг тайёрлиги 99 фоизга яқин», – деди у баҳорги дала ишлари бўйича ҳисоботида.
Шунингдек, вазир фермерларга имтиёзли дизель ёқилғиси етказиб берилганини ҳам таъкидлади.
«Энергетика вазирлиги томонидан жорий йилги экиш ишлари учун 401 минг тонна арзонлаштирилган дизель ёқилғиси ажратилди. Фермерлар учун якуний нарх литри учун 254 тенге, бу бозор нархидан 15 фоизга арзон. Ҳозирда 237 минг тонна (59 фоиз) арзонлаштирилган ёқилғи бўйича шартномалар тузилиб, тўлов амалга оширилди, шундан 218 минг тоннаси (54 фоизи) жўнатилди», — деди Айдарбек Сапаров.
Аввал мамлакатда экин майдонларининг умумий майдони 23,7 миллион гектарга етгани ҳақида хабар берилган эди.
