Астанада шу ҳафта охирида қишлоқ хўжалиги ярмаркалари бошланади

ASTANA. Kazinform - Астана шаҳрида мамлакат вилоятлари ишлаб чиқарувчилари иштирокида қишлоқ хўжалиги маҳсулотлари ярмаркалари бошланади. Улар 27 октябрга қадар ҳар шанба ва якшанба кунлари ўтказилади, дейилади пойтахт ҳокимлиги расмий сайти.

21 сентябрдан бошланадиган ярмаркада биринчи бўлиб Ақтўбе, Атирау ва Жамбил вилоятлари аграрлари ўз маҳсулотларини намойиш этади. Улар гўшт, балиқ, сут, озиқ-овқат маҳсулотлари, шунингдек, сабзавот ва меваларни бевосита фермерлардан таклиф қилишади. Бу озиқ-овқат билан таъминланиш даражасини оширишга ҳам, маҳаллий ишлаб чиқарувчини қўллаб-қувватлашга ҳам хизмат қилади.

Учта вилоятдан қишлоқ хўжалиги маҳсулотлари ишлаб чиқарувчилар Астанага 125 тонна гўшт ва гўшт маҳсулотлари, 250 тонна сабзавот ва мева, 26 тонна сут маҳсулотлари, 22 тонна балиқ, 26 минг дона тухум, 2 тонна нон маҳсулотлари ва 60 тонна бошқа озиқ-овқат маҳсулотларини олиб келишмоқда.

Ярмарка давомида концерт дастури ҳам ташкил этилади.

Қайд этиш жоизки, бу йил ярмарка Қарқарали шоссесида, “Қазанат” ипподроми рўпарасида бўлиб ўтади. Шунингдек, ярмарка давомида пойтахт аҳолиси ва меҳмонларига қулайлик яратиш мақсадида 18, 37, 303 ва 323-сонли автобус йўналишлари ҳам йўлга қўйилади.

Қишлоқ хўжалиги ярмаркаси соат 9:00 дан 18:00 гача ишлайди.