Аргентина вице-президентига суиқасд пайтида тўппонча отилмай қолган

NUR-SULTAN. Кazinform – Аргентина вице-президенти Кристина Фернандес де Киршнерга кимдир Буэнос-Айресдаги уйи ёнида суиқасд уюштирмоқчи бўлди, деб хабар беради Кazinform BBCга таяниб.

Номаълум шахс собиқ президентга яқинлашиб, уни отиб ташламоқчи бўлганида, унинг қуроли отилмай қолган. Ҳодиса Киршнер ўз тарафдорларини пойтахтдаги уйи олдида кутиб олганида содир бўлган.

Ижтимоий тармоқларда суиқасд лаҳзасини акс эттирувчи видео чоп этилди.

Унда Киршнер тарафдорлари билан саломлашгани, бир киши унга яқинлашиб, қурол кўтариб, юзига ўқ узмоқчи бўлганини кўриш мумкин.

Аргентина президенти Алберто Фернандеснинг айтишича, қурол ўқланган ва Киршнер тасодифан тирик қолган.

«Кристина хавфсиз. Ичида бешта патрон бўлган тўппонча номаълум техник сабабларга кўра отилмаган.

Унинг сўзларига кўра, бу суиқасд 1983 йилда ҳарбий диктатурадан демократияга ўтгандан бери мамлакат тарихидаги энг даҳшатли воқеалардан бири бўлди.

Эслатиб ўтамиз, 69 ёшли Киршнер 2007 йилдан 2015 йилгача Аргентина президенти бўлган.

Август ойида Аргентина бош прокурори икки президентлик давридаги коррупцияда айбланиб, уни 12 йилга қамоқ жазосига ҳукм қилишни ва умрбод давлат лавозимларида ишлаш тақиқланишини сўраган эди.

Хусусан, Киршнер давлатга қарийб бир миллиард долларга тушган пора ва пулни қайтариш тизимини ташкил қилганликда гумон қилинган. Киршнер ўзига қўйилган айбловларни рад этади ва уларни сиёсий қасос деб билади.

Ҳозирда унинг суд жараёни давом этмоқда. Сўнгги кунларда вице-президентнинг уйига юзлаб одамлар келиб, уни қўллаб-қувватлашини билдирди.

Киршнер иши бўйича қарор бир неча ой давом этади.

Фото: bbc.cоm