Анталияга Украина, Қозоғистон ва Молдовадан бораётган туристлар сони ортди

ANTALIA. Anadolu - Kazinform - Пандемияга қарамай, 2020 йил октябрь ойида Туркиянинг Анталия шаҳрига Украина, Қозоғистон ва Молдовадан бораётган сайёҳлар оқими ўтган йилнинг шу ойига нисбатан сезиларли даражада ошган, деб хабар беради Kazinform Анадолу агентлигига асосланиб.

«Хавфсиз туризм» дастури туфайли Анталия бутун дунё бўйлаб таътил учун энг хавфсиз жой сифатида ўзини кўрсатди.

Туркиянинг «сайёҳлик пойтахти»даги кўплаб меҳмонхона мажмуалари 150 хил санитария-гигиена талабларига жавоб берадиган «Соғлом туризм» сертификатларига эга бўлиб, бу ўз навбатида чет эллик сайёҳлар сонининг кўпайишига олиб келди.

Пандемия туфайли Анталияда сайёҳлик мавсуми бу йил одатдагидан кечроқ бошланди, аммо шунга қарамай, бир қатор мамлакатлардан келаётган сайёҳлар сонининг кўпайиши кузатилди.

Биргина октябрь ойида Анталияга 700 900 меҳмон таътилга келган.

Украинадан келган сайёҳлар сони 102 117 кишини ташкил этди. Ўтган йилнинг октябр ойида бу кўрсаткич 72 474 кишини ташкил қилган.

Ўтган ойда Қозоғистондан Анталияга 7130 одам таътилга борди. 2019 йил октябр ойида 6668 сайёҳ ташриф буюрганди.

Шунингдек, Молдовадан келган сайёҳлар сони ҳам сезиларли даражада ошди. Жорий йилнинг октябрь ойида 5880 киши, ўтган йилнинг шу ойида 3574 сайёҳ ташриф буюрган.