АҚШда қизамиқдан яна бир бола вафот этди

ASTANА. Кazinform — АҚШнинг Техас штатида юзлаб болалар қизамиқ билан касалланиб, яна бир бола вафот этди. Бу ҳақда Lianhe Zaobao хабар берди.

Нашрнинг ёзишича, марҳум қиз саккиз ёшда эди. У Техаснинг Лаббок шаҳридаги касалхонада қизамиқ билан боғлиқ ўпка етишмовчилигидан вафот этди. Бу сўнгги ўн йил ичида АҚШда қизамиқ билан боғлиқ иккинчи ўлимдир.

АҚШ Соғлиқни сақлаш вазирлиги ҳозирча вазиятга изоҳ бермади.

Бироқ, АҚШ соғлиқни сақлаш вазири Роберт Кеннеди совуқ хабарни эшитиши биланоқ иш сафари билан Техасга йўл олди.

Нашрнинг қайд этишича, Кеннеди маҳаллий вақт билан якшанба куни боланинг дафн маросимида иштирок этади. Вакцинацияга гумон билан қарадиган Кеннеди февраль ойида қизамиқдан биринчи ўлим ҳақида хабар берилганида юқумли касалликларнинг тарқалишини одатий ҳол деб ҳисоблаган.

Техас соғлиқни сақлаш хизмати 4 апрель ҳолатига кўра, болаларда қизамиқ билан касалланган яна 59 та ҳолат қайд этилган. Январь ойи охиридан бери Техасда жами 481 та ҳолат тасдиқланган.

Қизамиқ бошқа штатларда, жумладан Нью-Мексико, Оклахома ва Колорадода ҳам қайд этилган.

Феврал ойида Техасда бир бола қизамиқдан вафот этди. Март ойида Нью-Мексикода эмланмаган катта ёшли одам ўлимидан кейингина қизамиқ билан касалланганлиги аниқланди. Ҳозирда маҳаллий суд-тиббиёт хизмати унинг ўлимининг аниқ сабабларини ўрганмоқда.

АҚШ Касалликларни назорат қилиш ва олдини олиш марказининг (CDC) 3 апрелдаги маълумотларига кўра, бир ҳафта ичида мамлакат бўйлаб қизамиқнинг 124 та янги ҳолати қайд этилган ва йил бошидан буён қизамиқ билан касалланганларнинг умумий сони 607 тага етган. Ўтган йили Қўшма Штатларда 285 киши қизамиқ билан касалланган. Расмий маълумотларга кўра, бу йил қизамиқ билан касалланганларнинг 97 фоизи эмланмаган ёки эмлаш мақоми номаълум бўлган.

Эслатиб ўтамиз, аввалроқ АҚШда торнадо оқибатида етти киши ҳалок бўлганлиги ҳақида хабар берган эдик.