Афғонистоннинг ташқи сиёсати иқтисодий ва савдо ҳамкорликка асосланган – бизнес-форум

ASTANA. Kazinform – Афғонистон ҳукумати халқаро, минтақавий ва глобал бизнес учрашувлари ва кўргазмаларида фаол иштирок эта бошлади. Бу ҳақда Афғонистон саноат ва савдо вазири Нуриддин Азизий маълум қилди, дея хабар беради Kazinform мухбири.

«Афғонистон халқи ва ҳукумати минтақавий ҳамкорликни ривожлантириш ва Афғонистоннинг фаровон ва ўзини-ўзи таъминловчи давлатга айланиш имкониятларидан фойдаланишга бел боғлаган. Бу вазифа ҳукуматимиз ва халқимиздан катта меҳнат ва саъй-ҳаракатларни талаб қилади», – деди Нуриддин Азизий Астана шаҳрида бўлиб ўтган бизнес-форумда.

У Афғонистон қисқа вақт ичида савдо, транзит ва сармоя каби турли соҳалардаги икки томонлама ва минтақавий ҳамкорликда фаол иштирок эта олганини таъкидлади.

Маърузачи ушбу учрашув Афғонистон, Қозоғистон ва Россия Федерацияси ўртасида ўзаро савдо, транзит ва сармоявий шартномалар, савдо ва транзит бўйича уч томонлама шартномалар тузиш орқали минтақавий муносабатларни ошириш ва ривожлантиришнинг бошланиши бўлишига умид билдирди.

«Фурсатдан фойдаланиб, Афғонистон Ислом Амирлигининг ташқи сиёсати минтақавий интеграция, иқтисодий ва савдо ҳамкорлигига асосланган мустақил, мувозанатли ва иқтисодиётга йўналтирилган сиёсат эканлигини эълон қилмоқчиман. Афғонистоннинг барча идоралари эса бу мақсадга эришиш учун узлуксиз ишлашга тайёр. Тарихан Афғонистон маданий ва тижорат алмашинувлари учун дарвоза бўлган ва ҳозирда Афғонистон ҳукумати хусусий сектор билан яқин ҳамкорликда халқаро, минтақавий ва глобал бизнес учрашувлари ва кўргазмаларида иштирок этиш орқали Афғонистонни янада муҳим рол ўйнашига интилмоқда», – деди Афғонистон вазири.

Н. Азизий Афғонистоннинг геоиқтисодий ҳолатидан Афғонистон ва минтақа манфаати учун самарали фойдаланилишига умид билдирди.

«Ҳаво йўлаги яратиш, икки давлат ҳудудида банкларимиз ваколатхоналарини очиш, тадбиркорлар учун виза пунктларини ташкил этиш, иш учрашувлари, кўргазма ва конференциялар ўтказиш, умумий макон яратиш, Қозоғистонга юк ташиш муддатларини қисқартириш, Қозоғистон билан транзит тўсиқларини олиб ташлаш – бу масалани ҳақиқатга яқинлаштиради. Бизнинг фикримизча, кўпгина мамлакатларда иқтисодий ўсиш ва одамларнинг ҳаёт сифатини яхшилашнинг муҳим сабаби уларнинг саноат ривожланиши билан боғлиқ. Афғонистон Саноат ва савдо вазирлиги ушбу соҳанинг аҳамиятини англаган ҳолда уни ривожлантиришни устувор вазифа қилиб қўйди», – деди Нуриддин Азизий.

Муаллиф: Айжан Серикжанқизи