Жанубий Африкада сув тошқини оқибатида 300 га яқин одам ҳалок бўлди
Икки кун аввал бошланган кучли ёмғир сўнгги 60 йилдаги энг йирик тошқинларга олиб келди. Баъзи ҳудудларда бир неча ой давомида кучли ёмғир ва кўчкилар содир бўлди.
«13 апрел куни кечқурун Квазулу-Натал провинциясидаги сув тошқини қурбонлари сони 306 нафарга етгани ҳақида маълум бўлди», — деди Табиий офатларга қарши кураш бошқармаси матбуот котиби Нонала Ндлову.
Президент Сирил Рамафоса сув тошқинлари ва кўчкилардан жабр кўрган Дурбан аҳолиси билан учрашишга ваъда берди. Унинг қайд этишича, фалокат иқлим ўзгаришининг кўринишидир.
Воқеа жойида қидирув-қутқарув ишлари олиб борилмоқда. Жабрланганлар сони ортиши мумкин.
Жорий йилнинг бошида Африканинг жануби-шарқий қирғоқларини сув босган «Ана» тропик тўфони 46 кишининг ҳаётига зомин бўлган эди.