Ўзгидромет маълумотларига кўра, 22 – 23 июл кунлари Ўзбекистоннинг бир қанча ҳудудларида ҳаво ҳарорати рекорди янгиланди.
22 июл куни Хоразм вилоятининг Туямўйин ( 47,5 даража) ва Навоий вилоятининг Учқудуқ ( 46,3) туманида мутлақ ҳарорат рекорди ўрнатилди. Аввалги рекордлар 2021 йилда мос равишда 46,1 ва 46,2 даражага ўрнатилган эди.
Ўша куни Нукусда ҳаво ҳарорати 43,7 даражага кўтарилган (аввалги рекорд 2018 йилда 42,2 даража эди). Урганчда ҳаво ҳарорати - 45,4 даража (1973 йилда 41,4 даража), Бухорода - 45,8 даража (2018 йилда 44,7 даража), Андижонда - 40,7 даража (1948 йилда 40,1 даража) кузатилди.
23 июл куни Тошкент шаҳрида ҳаво ҳарорати 42,8 даражагача кўтарилиб, 2018 йилдаги рекорддан ( 42,2 даража) ошиб кетди.
Синоптикларнинг таъкидлашича, метеорологик кузатишлар тарихида Ўзбекистонда энг юқори ҳарорат ( 50°) 1944 йил июл ойида Қизилқум чўли ва Термиз шаҳрида қайд этилган.
Аввалроқ Ўзбекистонда уч кун ичида жазирама туфайли 4 мингдан ортиқ одам касалхонага ётқизилганди.