Япония юқори палатасига сайланган аёллар сони рекорд даражага етди

ASTANA. Kazinform – Япониянинг Маслахатчилар палатасига бўлиб ўтган сайловда 42 аёл депутат этиб сайланди. Бу 2022 йилда қайд этилган 35 аёллик илгариги рекорддан ошиб тушди, деб хабар берди Kyodo News агентлиги.

Аёллар 125 ўриндан 33,6 фоизини эгаллади.

Сайловда жами 152 нафар аёл иштирок этди, 2022 йилда бу кўрсаткич 181 нафарни ташкил этган эди. Кандидатлар орасида аёллар улуши 29,1 фоизни ташкил қилди, бу эса Япония ҳукуматининг 2025 йилга қўйган 35 фоизли мақсадидан паст. 2022 йилда бу кўрсаткич 33,2 фоиз бўлиб, тарихдаги энг юқори даража сифатида қайд этилган эди.

Жаҳон иқтисодий форуми томонидан эълон қилинган 2025 йилги Гендер тенгсизлиги индексида Япония сиёсий ҳуқуқ ва имкониятларни кенгайтириш соҳасида паст натижа қайд этиб, 148 давлат ичида 118-ўринни эгаллади. Жорий йил июнь ойида эълон қилинган ҳисоботга кўра, иқтисодиёт, таълим ва соғлиқни сақлаш соҳаларида муайян ўсиш кузатилган.

152 аёл номзоднинг 102 нафари округлар бўйича, қолган 50 нафари пропорционал тизим асосида сайловда қатнашди.

Эслатиб ўтамиз, Япониянинг ҳокимият коалицияси парламент юқори палатасидаги кўпчилик ўриндан маҳрум бўлди. Шунга қарамай, бош вазир Сигэру Исиба истеъфога чиқиш нияти йўқлигини маълум қилди.