Янги Рим Папасини сайлаш эҳтимолий санаси маълум қилинди

VATICAN. Kazinform – Рим Папасини сайлаш учун кардиналлар йиғилиши – конклав 5 май куни бўлиб ўтиши мумкин. Бу ҳақда ТАСС агентлиги ёзди.

Ватиканнинг Муқаддас тахти матбуот хизмати маълум қилишича, чоршанба куни бўлиб ўтган кардиналлар конгрегацияси мажлисида Папа вафот этганидан сўнгги тўққиз кунлик мотам – “новендиал” 26 апрелдаги дафн маросими билан бошланиб, 4 майга қадар давом этади.

Айни пайтда Апостол тахти бўш қолган даврдаги муваққат масалаларни ҳал қилиш учун тузилган конгрегацияда 103 нафар кардинал иштирок этмоқда. Ватиканда яқин кунларда яна бошқа черков амалдорларининг келишлари кутилмоқда.

Кардиналлар коллегияси жами 252 нафар, шундан 135 нафари конклавда овоз бериш ҳуқуқига эга. Улар 80 ёшга тўлмаган кардиналлар бўлиб, ҳар бири Янги Папа лавозимига номзод сифатида кўрилади. Конклав анъанавий равишда Ватикандаги Сикстин капелласида ўтказилади. Ҳар куни тўрт марта овоз бериш жараёни амалга оширилади. Янги Папа сайланиши учун кардиналларнинг учдан икки қисми унга овоз бериши керак бўлади.

Эслатиб ўтамиз, Рим Папаси Франциск жорий йилнинг 21 апрель куни, 89 ёшида вафот этди.

У 2013 йилдан буён Рим-католик черковига раҳбарлик қилган эди. Франциск васиятига биноан Санта-Мария-Маджоре базиликасида дафн этилади.

Папанинг ватани Аргентинада бир ҳафталик мотам эълон қилинди.