Ўзбекистонлик Муроджон Аҳмадалиев 30 май куни Мексикада жанг қилади

TASHKENT. Kazinform - Профессионал бокс бўйича Ўзбекистон шарафини муносиб ҳимоя қилаётган Муроджон Аҳмадалиев шу йилнинг 14 сентябрь куни Япониянинг Токио шаҳрида иккинчи энг енгил вазнда мутлақ жаҳон чемпиони япониялик Наоя Иноуэ билан жанг ўтказади, деб хабар беради Kazinform агентлиги UzAга таяниб.

Мазкур жангга пухта тайёргарлик кўриш, ўзининг устун ва камчиликларини билиб олиш мақсадида Муроджон Аҳмадалиев Наоя Иноуэга қарши жанг олдидан 30 май куни Мексиканинг Гваделахара шаҳрида ўтказиладиган профессионал бокс оқшомида мезбон Луис Кастильога қарши рингга кўтарилишни лозим топди.

Айни вақтда Муроджон Аҳмадалиев профессионал рингга 14 бора кўтарилиб, уларнинг 13 тасида ғалабага эришган (10 та нокаут) бўлса, 1 маротаба мағлуб бўлган. Унинг навбатдаги рақиби Луис Кастильо эса 23 та жангдан 21 тасида ғолиб бўлган (13 КО) ва 1 тадан дуранг ва мағлубият қайд этган.

Даровақе, Наоя Иноуэ АҚШнинг Лас-Вегас шаҳрида америкалик Рамон Карденасга қарши рингга кўтарилди ва 12 раундга мўлжалланган жангнинг саккизинчисида рақибини техник нокаутга учратиб, чемпионлик камарларини яна бир бор муваффақиятли ҳимоя қилди. Шу тариқа, Наоя ўзининг 30 жангида ҳам ғалаба қозонди.

Эслатиб ўтамиз, Муроджон Аҳмадалиев навбатдаги жангига Наоя Иноуэнинг бўлажак рақиби билан тайёрланаётгани ҳақида хабар берган эдик.