Ўзбекистонлик боксчи Муҳаммад Шехов Будапештда жанг ўтказади

TASHKENT. Kazinform - 26 апрель куни Венгрия пойтахти Будапешт шаҳридаги "Folyondar Sports Hall" мажмуасида профессионал бокс оқшоми ўтказилади, деб хабар беради Kazinform агентлиги Ўзбекистон профессионал бокс федерациясига таяниб.

Ушбу бокс турнири доирасида иккинчи энг енгил вазн тоифасида фаолият олиб бораётган ўзбекистонлик чарм қўлқоп устаси Муҳаммад Шехов венесуэлалик Орландо Моралесга қарши рингга кўтарилади. Жанг 8 раунд этиб белгиланган.

Маълумот учун, бухоролик 32 ёшли боксчи фаолияти давомида 16 та жанг ўтказиб, 15 ғалаба ва 1 та дуранг қайд этган. У сўнгги жангини ўтган йилнинг декабрь ойида хитойлик Зонг Лиуга қарши ўтказиб, очколар ҳисобига кўра ғалаба қозонган ва вакант бўлиб турган IBF Intercontinental камарини қўлга киритганди. Шехов ҳозирда WBO рейтингида 5-ўринни эгаллаб турибди.

Унинг бўлажак рақиби, 20 ёшли Орландо Моралес ҳисобида эса 13 ғалаба ва 2 мағлубият бор.

Эслатиб ўтамиз, аввалроқ WBA Шаҳрам Ғиёсов - Жарон Эннис жангига буйруқ бергани ҳақида ёзган эдик.

Шунингдек, ўзбекистонлик Абдуллаев ва Турғунбоев навбатдаги жанглари учун Венгрияга йўл олди.