Қозоғистондан Ўзбекистонга янги ҳаво йўналиши очилади

ҚР Транспорт вазирлиги парвозлар географиясини кенгайтириш ва мавжуд йўналишлар бўйича парвозлар сонини кўпайтириш бўйича доимий иш олиб бормоқда.

Жорий йил 1 майдан Қозоғистоннинг "Qazaq Air" авиакомпанияси Ўзбекистонга “Астана – Туркистон – Самарқанд” йўналиши бўйича янги йўналиш очишни режалаштирмоқда. Парвозлар ҳафтасига икки марта (пайшанба ва якшанба кунлари) амалга оширилади.

Шундай қилиб, Қозоғистон ва Ўзбекистон ўртасидаги умумий рейслар ҳафтасига 42 тадан 44 тага ошади.

Ҳаво қатновининг очилиши икки давлат ўртасидаги савдо-иқтисодий, бизнес ва туризм соҳасидаги ҳамкорликни янада ривожлантиришга хизмат қилиши кутилмоқда.