Ўзбек ёзувчисининг асари халқаро Андерсен мукофотига номзод

TASHKENT. Kazinform - Ўзбекистонлик болалар ёзувчиси, турли жанрдаги 60 дан ортиқ китоблари чоп этилган адиба, Ўзбекистон Ёзувчилар уюшмаси аъзоси Муҳаббат Йўлдошеванинг “The Secret of mouse” (“Сичқончанинг сири”) номли инглиз тилидаги китоби Халқаро Ханс Кристиан Aндерсен мукофотига номзод сифатида тавсия этилди, деб хабар беради Kazinform агентлиги UzAга таяниб.

Мазкур мукофот 1956 йилда дунё болалар ёзувчиларини бирлаштириш мақсадида таъсис этилган бўлиб, адабиёт оламида “Кичик Нобель мукофоти” деб ҳам аталади.

Муҳаббат Йўлдошева фантаст-ёзувчи, журналист, сценарист, кинотаржимон сифатида Ўзбекистон адабий майдонида ижод қилади.

Маълумотларга кўра, Муҳаббат Йўлдошева 1964 йил 22 мартда Тошкент вилоятида туғилган. Тошкент Политехника институти – ҳозирги Ислом Каримов номидаги Тошкент давлат техника университетининг тоғ-металлургия факультетини битирган.

1989 йилдан Ўзбекистон Ёзувчилар уюшмаси аъзоси. Муҳаббат Йўлдошеванинг фантастик ҳикоя ва эртаклари инглиз, серб, ҳинд, бенгал, корейс, қозоқ, хитой, украин, беларусь, вьетнам ва рус тилларига таржима қилинган. Асарлари Миср, АҚШ, Хитой, Жанубий Корея, Англия, Покистон, Украина, Қозоғистон, Вьетнам ва бошқа давлатларда нашр этилган.

Муҳаббат Йўлдошева Москвада ўтказилган “Белая скрижаль” I Халқаро ҳикоялар танловида болалар адабиёти йўналиши бўйича ғолиб бўлган.

2013 йилда Жанубий Кореяда ўтказилган Ўрта Осиё мамлакатлари халқларининг мифлари, эртаклари ва афсоналари асосидаги сценарийлар халқаро танловида “Кўҳи-Қоф шаҳзодаси” номли бадиий фильм сценарийси билан 1-ўринни эгаллаган.

Ижодкор 2022 йилда Ўзбекистон Ёзувчилар уюшмаси томонидан ўтказилган “Аёлга эҳтиром” адабий танловининг ғолиби бўлган.

Эслатиб ўтамиз, аввалроқ Қозоғистон ва Ўзбекистон президентлари Қастеев ва Тансиқбоев асарларини томоша қилишгани ҳақида хабар берган эдик.