Трамп АҚШдаги сайловларда овоз бериш қоидаларини қатъийлаштирмоқчи

ASTANA. Kazinform - АҚШ президенти Дональд Трамп АҚШда овоз бериш қоидаларини қатъийлаштирувчи фармонни имзолади, деб хабар беради Кazinform агентлиги dw.comга таяниб.

Бу ҳақда 25 март, сешанба куни Оқ уй сайтида хабар берилди. Унда қайд этилишича, фармон “сайловчи фуқаролигини текшириш устидан назоратни кучайтиради ва чет эл фуқароларининг АҚШ сайловларига аралашувини тақиқлайди”.

Трамп бир қанча федерал идораларга сайловчиларни рўйхатга олиш, почта орқали овоз бериш ва сайлов мониторинги устидан назоратни кучайтириш чораларини кўришни буюрди. Фармон, шунингдек, АҚШ фуқаролигини исботлаш учун қаттиқроқ талабларни ва сайловларда фирибгарликда гумон қилинганларга қарши курашни кучайтиришни ўз ичига олади.

Dpa агентлиги таъкидлаганидек, АҚШ президенти штат органларини сайлов қонунларини ўзгартиришга бевосита мажбурлай олмайди, шунинг учун Трамп уларга молиявий босим ўтказишни режалаштирмоқда. Ҳужжатга кўра, ўз сайловларининг "хавфсизлигини таъминлаш" учун чоралар кўрмаган штатлар "фирибгарликка қарши курашишни истамаганликлари" сабабли федерал молиялаштиришдан маҳрум бўлишлари мумкин.

Ҳуқуқ ҳимоячилари Трампни аҳолининг айрим гуруҳлари учун овоз беришни атайлаб қийинлаштирганликда айбламоқда, деб хабар беради dpa.

Ишончлироқ сайлов тизимининг намунаси сифатида Трамп Германияни тилга олди, у ерда АҚШда қабул қилинган турли хил овоз бериш усулларидан фарқли ўлароқ, фақат қоғоз бюллетенлардан фойдаланилади, дея АҚШ президенти сўзларидан иқтибос келтирди dpa.

Трамп 2020 йилги президентлик сайловидаги мағлубиятини ҳали тан олгани йўқ ва унинг кенг тарқалган фирибгарлик ҳақидаги асоссиз даъволари унинг фанатик тарафдорлари 2021 йилда Капитолийга бостириб киришининг асосий сабабларидан бири бўлган.

Эслатиб ўтамиз, аввалроқ Трамп АҚШни “Олтин гумбаз” билан ҳимоя қилмоқчи эканлиги ҳақида хабар берган эдик.