Сицилияда Этна вулқонининг отилиши сайёҳлар орасида саросима келтириб чиқарди

ASTANA. Kazinform – 2 июнь куни Сицилиянинг шарқий соҳилида Европадаги энг баланд ва фаол вулқон — Этнанинг навбатдаги отилиши содир бўлди.

Кратердан кўтарилган зич тутун ва кул устуни бир неча километр баландликка етди, бу эса вулқон атрофида бўлган сайёҳлар орасида саросимага сабаб бўлди.

Гувоҳлар отилишни кучли гўнглаш ва вулқондан чиққан лава оқимлари билан кузатганликларини маълум қилишди.

Италия Миллий геофизика ва вулканология институти (INGV) маълумотларига кўра, отилишга жануби-шарқий кратер қисмининг ёрилиши сабаб бўлган, натижада лава оқимлари пайдо бўлган. Бу Этна вулқонида сўнгги ойларда қайд этилган 14-отиш ҳодисаси бўлди.

Маҳаллий ҳокимиятлар отилиш аҳоли учун бевосита хавф туғдирмаётганини тасдиқлади. Аммо эҳтиёт чораси сифатида вулқон чўққиси атрофи сайёҳлар учун ёпилди. Катания аэропорти хавф даражасини оширди, аммо парвозлар жадвалида жиддий ўзгаришлар қайд этилмади.

Ҳодиса ижтимоий тармоқларда кенг муҳокамага сабаб бўлди. Фойдаланувчилар портлашдан олинган ҳайратланарли видеоларни бўлишмоқда. Кадрларда сайёҳлар отилиш ҳудудини шошилинч тарк этаётгани, вулқон устида эса зич тутун ва кул кўтарилаётгани акс этган.

3300 метр баландликда жойлашган Этна вулқони тахминан 1200 квадрат километр майдонни эгаллайди. У Сицилиянинг асосий табиий обидаларидан бири ва ЮНЕСКОнинг Бутунжаҳон мероси рўйхатига киритилган. Қайта-қайта содир бўладиган отилишларга қарамасдан, вулқон дунё бўйлаб минглаб сайёҳларни ўзига жалб этишда давом этмоқда.