Шимолий Корея гипертовушли ракетани муваффақиятли синовдан ўтказгани ҳақида хабар берди

Пхеньян гипертовушли қуролларни яратишда янги ютуқларни маълум қилди. КХДР расмийларига кўра, гипертовушли бошқариладиган каллакка эга ўрта масофага учувчи ракета муваффақиятли синовдан ўтказилди, деб хабар беради Кazinform агентлиги DWга таяниб.

Ўзини ядровий давлат деб эълон қилган Шимолий Корея гипертовушли каллакка эга ўрта масофали ракеталарни яратиш бўйича янги ютуқларини маълум қилди. "Якшанба куни КХДР Ракетасозлик бош бошқармаси гипертовушли маневрли бошқариладиган каллакка эга қаттиқ двигателли ўрта узоқ масофага мўлжалланган баллистик ракетани синовдан ўтказди. Учириш муваффақиятли бўлди", - дея хабар берди Шимолий Корея матбуоти 15 январь, душанба куни.

Ҳисоботда таъкидланишича, синов учирилишидан мақсад "ўрта узоқ масофага мўлжалланган гипертовушли маневрли бошқариладиган жанговар каллакнинг сирпаниш ва маневрли парвоз хусусиятларини ва янги кўп босқичли оғир юкли қаттиқ ёқилғи реактив двигателларининг ишончлилигини тасдиқлаш" эди.

БМТ резолюцияларини бузиш

КХДРдаги ракета синовлари Жанубий Корея ва Японияда қайд этилган. Жанубий Корея ҳарбийларига кўра, ўрта масофага мўлжалланган ракета минг километрга яқин учиб, Япон денгизига қулаган. Жанубий Корея синовни қоралаб, буни Пхеньянга ҳар қандай масофадаги баллистик ракеталарни синовдан ўтказишни тақиқловчи БМТ резолюцияларининг аниқ бузилиши деб атади. Бундай ракеталар ядро каллаклари билан жиҳозланиши мумкин.

Жанубий Кореянинг "Ренхап" ахборот агентлиги хабарида қайд этилишича, Пхеньяннинг янги ракета синови КХДР АҚШ континенталини уриб туширишга қодир бўлган “Хвасон-18” қаттиқ ёнилғили қитъалараро ракетасини синовдан ўтказган 18 декабрдан бери биринчи синовдир.