Сенат Раиси Хитойнинг Қозоғистондаги Элчиси билан учрашди
ASTANА. Кazinform – ҚР Парламенти Сенати Раиси Маулен Ашимбаев яқинда мамлакатда дипломатик миссиясини бошлаган Хитой Халқ Республикасининг Қозоғистондаги Фавқулодда ва Мухтор Элчиси Хань Чуньлин билан учрашди.
Сенат Раиси ҳозирда Қозоғистон ва Хитой ўртасидаги муносабатлар мисли кўрилмаган кенг қамровли ва мустаҳкам стратегик шериклик даражасига кўтарилганини таъкидлади. Маулен Ашимбаев, шунингдек, элчи Хань Чуньлиннинг дипломатик миссияси икки томонлама ҳамкорликнинг янги “Олтин даври”га тўғри келганига эътибор қаратиб, унинг катта рамзий аҳамият касб этишини таъкидлади ва кўп томонлама алоқалар келажакда янада мустаҳкамланишига ишонч билдирди.
Суҳбат чоғида икки давлат раҳбарлари ўртасидаги дўстона муносабатлар Қозоғистон-Хитой ҳамкорлигини оширишда ҳал қилувчи ўрин тутаётгани ва бунинг шарофати билан бугунги кунда муҳим келишувларга эришилгани таъкидланди.
– Мамлакатларимиз раҳбарлари ўртасидаги яқин ва ишончли мулоқот стратегик шерикликни мустаҳкамлашда алоҳида ўрин тутади. Мунтазам равишда ўтказилаётган олий даражадаги учрашувлар ва ўзаро ташрифлар натижасида муҳим келишувларга эришилди ва бир қатор истиқболли икки томонлама ҳужжатлар имзоланди. Ана шу жадаллик туфайли Қозоғистон ва Хитой ўртасидаги муносабатлар тараққиётнинг янги “олтин даври”га қадам қўймоқда. Давлат раҳбарлари даражасида эришилган келишувларни самарали амалга оширишга ҳисса қўшиш асосий вазифамиздир, – деди Маулен Ашимбаев.
Учрашувда томонлар Қозоғистон ва Хитойнинг глобал ва минтақавий кун тартибидаги долзарб масалалар бўйича позициялари ўхшашлигини таъкидладилар. Шунингдек, парламентлараро, БМТ, ШҲТ, ОҲИЧК каби халқаро ва минтақавий ташкилотлар доирасидаги ўзаро ҳамкорлик доирасида глобал тараққиёт, умуминсоний хавфсизлик ва тинчликни таъминлаш бўйича қўшма ташаббусларга ҳам эътибор қаратилди.
Сенат Раиси, шунингдек, элчи Хань Чуньлинга Қозоғистон Президенти Қасим-Жомарт Тоқаев ташаббуси билан мамлакатда амалга оширилаётган ислоҳотлар ҳақида сўзлаб берди. У ўз нутқида Давлат раҳбарининг ҳудудларни ривожлантириш ва миллий иқтисодиётни диверсификация қилишга қаратилган ташаббусларига атрофлича тўхталиб, амалга оширилаётган ислоҳотларнинг стратегик аҳамиятига эътибор қаратди.
Ўз навбатида, Элчи фаол ҳамкорлик учун миннатдорчилик билдирди ва Қозоғистонда амалга оширилаётган ижтимоий-сиёсий ислоҳотларни юқори баҳолади. Шунингдек, у Қозоғистон ва Хитой ўртасидаги ҳамкорликни янада мустаҳкамлашдан манфаатдор эканлигини билдирди.
Эслатиб ўтамиз, аввалроқ Сенат Раиси иқтисодиётни ривожлантиришга қаратилган бир қатор муҳим қонунлар қайта кўриб чиқилиши ҳақида гапирган эди.