SARBAZ+ лойиҳаси: Қозоғистонда ҳарбий хизматнинг янги формати йўлга қўйилди

ASTANA. Kazinform — Қозоғистон Мудофаа вазирлиги ҳарбий хизматнинг янги форматдаги SARBAZ+ номли пилот лойиҳасини амалга оширмоқда. Ушбу дастур ҳарбий хизматчиларни тайёрлаш сифатини ошириш ва замонавий технологияларни кундалик армия ҳаётига жорий этишга қаратилган.

Жорий йил кузида Алмати вилоятида жойлашган 78460-ҳарбий қисмда Ҳаво мудофааси қўшинларининг 150 нафар чақирувчиси мазкур янги форматда хизмат қилишни бошлайди. SARBAZ+ аскарларнинг шахсий ва касбий салоҳиятини ривожлантириш, хизмат шароитларини яхшилаш ҳамда кундалик фаолиятни бошқаришда рақамли ечимларни жорий этишни синовдан ўтказиш майдонига айланади.

Лойиҳага тайёргарлик доирасида Мудофаа вазирининг рақамли технологиялар бўйича ўринбосари Дархан Ахмедиев ҳарбий қисмга ташриф буюрди. У билан бирга Парламент Мажилиси депутати Олжас Қуспеков ҳамда «Қазақтелеком» АЖ, «Транстелеком» АЖ, «BI Group» АЖ, «Invictus Fitness» МЧЖ, «Қазақстан ГАЖ Орталығы» АЖ ва Алмати шахмат клубининг ҳамкор ташкилотлари вакиллари ҳам қатнашди. Улар инфратузилма объектлари билан танишиб, янги футбол майдони ва электрон тирнинг очилишида иштирок этди.

SARBAZ+ лойиҳаси ҳарбий хизматга касбий ўқув элементлари, рақамли ечимлар, тиббий мониторинг тизими ва бўш вақтни самарали ташкил этишни ўз ичига олади.

“Ҳар бир ҳарбий хизматчига реал вақтда биометрик кўрсаткичларни кузатиш имконини берадиган фитнес-билагузук тақдим этилиши режалаштирилган. Ундан олинган маълумотлар марказлашган мониторинг тизимига узатилади ва бу тиббий ходимлар ҳамда командирларга шахсий таркиб соғлиғини доимий назорат қилишга ёрдам беради. Шунингдек, видео таҳлил тизими ҳам жорий этилмоқда”, – дейилади вазирлик ахборотида.

Ҳарбий қисм ҳудудида қурилиш ва таъмирлаш ишлари якунланмоқда. Спорт иншоотлари янгиланмоқда, тренажёрлар ўрнатилмоқда, ўйин спорт турлари учун майдончалар ҳамда томошабинлар учун зоналар барпо этилмоқда. Логик фикрлашни ривожлантириш ва зеҳний фаолликни қўллаб-қувватлаш мақсадида шахмат тўгаракларини йўлга қўйиш ҳам режада бор.

Лойиҳа доирасида телекоммуникация ва IT соҳаларида — «Қазақтелеком» ва «Транстелеком» компаниялари билан ҳамкорликда асосий ўқув курслари ташкил этилади. Хизматни тугатгач, иштирокчилар аттестациядан ўтиб, ишга жойлашишда фойдали бўладиган сертификатларга эга бўлади. Шунингдек, учувчисиз учиш қурилмалари ва радиоалоқа асосларига ўқитиш ҳам кўзда тутилган. Қўшимча равишда, қатнашчилар учун қозоқ ва инглиз тилларида дарслар ташкил этилади.

Ҳарбий хизматчиларнинг психологик ҳолатини қўллаб-қувватлаш учун “эмоцияни чиқариш хонаси” очилади. Офицерлар ва сержантлар учун эса замонавий, салоҳиятли ва стрессга бардошли ҳарбий мутахассисни шакллантиришга қаратилган шахсни ривожлантириш бўйича махсус тренинглар режалаштирилган.

SARBAZ+ фақат чақирув асосида хизмат қилаётганларга эмас, балки ҳарбий қисмнинг офицерлар ва сержантлар таркибига ҳам таъсир қилади. Жумладан, улар CCNA Cisco халқаро дастури доирасида малакаларини оширади.

Чақирувчиларни саралашни енгиллаштириш мақсадида лойиҳанинг расмий веб-сайти ишлаб чиқилди. У ерда хизматга қабул қилиш тартиби, шартлари ва саралаш босқичлари ҳақида маълумотлар жойлаштирилган. Чақирувчилар онлайн-рўйхатдан ўтишлари мумкин, кейин уларнинг анкеталарини ҳарбий қисм ва маҳаллий ҳарбий бошқарув органлари вакиллари кўриб чиқади. Саралашдан ўтган номзодларга қабул қилингани ҳақида хабар юборилади.

“SARBAZ+ – бу фақат ҳарбий хизматнинг намунаси эмас, балки шахсий ва касбий ўсиш имконияти ҳам. Биз ҳар бир чақирувчининг фойдали билим ва кўникмаларга эга бўлиб, фуқаролик ҳаётида улардан фойдаланишига интилмоқдамиз”, – деди Мудофаа вазирининг ўринбосари Дархан Ахмедиев.

Лойиҳа муваффақиятли амалга оширилса, у Қозоғистон Қуролли Кучларининг бошқа бўлинмаларида ҳам босқичма-босқич жорий этилиши режалаштирилган.