Сўнгги икки кун ичида Россиядан келаётган мигрантлар сони сезиларли даражада камайишни бошлади – ҚР Ҳукумати

ASTANA. Кazinform – Бугун Қозоғистон Бош вазири Алихан Смаилов миграциянинг долзарб масалалари бўйича йиғилиш ўтказди, дея хабар беради Кazinform.

Ички ишлар вазири Марат Ахметжанов 21-28 сентябр кунлари Россия Федерациясидан мамлакат ҳудудига келган мигрантлар сони 2-3 баробарга ошганини айтди.

Ҳукумат матбуот хизмати хабарига кўра, фақат сўнгги икки кун ичида бу мамлакатдан ташриф буюрувчилар сони сезиларли даражада камайишни бошлаган.

Ҳисобот даврида Россия Федерациясининг 382 нафар фуқароси доимий яшаш учун, 64 нафар фуқаро Қозоғистон Республикаси фуқаролигини олиш учун ариза топширган.

Вазирнинг сўзларига кўра, бугунги кунда мамлакатда криминоген вазият барқарор. Қозоғистон фуқароларига нисбатан мигрантлар томонидан содир этилган жиноятлар қайд этилмаган.

Шу билан бирга, Ички ишлар вазирлиги томонидан чет эл фуқароларининг жамоат хавфсизлиги ва қонунийлигини таъминлаш назорати кучайтирилди, хусусан, аҳоли зич жойлашган жойларда полиция бўлинмалари сони кўпайди.

Қозоғистон Республикаси Миллий хавфсизлик қўмитаси раиси ўринбосари, Чегара хизмати директори Ерлан Алдажуманов тегишли инфратузилмага эга бўлган назорат-ўтказиш пунктларида Қозоғистон фуқаролари, юк машиналари ва хорижликлар учун алоҳида йўлаклар ажратилганини маълум қилди.

«Ҳозирда Қозоғистон фуқаролари чегарани кесиб ўтишда ҳеч қандай муаммо йўқ», - деди у.

Бош вазирнинг айтишича, айрим назорат пунктларида ҳамон узун навбатлар мавжуд.

«Россия чегара хизмати билан ҳамкорликни кучайтириш, икки томондан одамлар йиғилмаслиги учун ягона алгоритм ишлаб чиқиш зарур. Сабаби, бу бизнес ва одамларнинг асосли норозилигига сабаб бўлмоқда», — деди Алихан Смаилов.

Шунингдек, Алихон Смаилов уй-жойларни ижарага беришда фуқароларнинг ҳуқуқларини тушунтириш ишларини кучайтириш бўйича топшириқ берди.

«Гап нафақат мигрантлар оқимида, балки фуқароларимиз ҳам ўз ҳуқуқларини билиши керак. Egov ёки оммабоп иловалар орқали томонларнинг ҳуқуқ ва мажбуриятларини кўрсатадиган стандарт ижара шартномасини рақамли имзолаш имкониятини яратиш керак. Бу ҳар икки томоннинг ҳуқуқларини ҳимоя қилиш имконини беради», - деди Алихан Смаилов.

Йиғилиш якунида Бош вазир давлат органлари ва ҳокимликлар томонидан миграция ҳолатини тартибга солиш бўйича комплекс ва самарали чоралар кўриш зарурлигини таъкидлади.

«Биринчи навбатда, Қозоғистон фуқаролари учун доимий «яшил йўлак»ни таъминлаш, шунингдек, рўйхатдан ўтмаган мигрантларни аниқлаш бўйича мобил мониторинг гуруҳлари фаолиятини йўлга қўйиш зарур», - деди Алихан Смаилов.

Фото: primeminister.kz