Россиянинг салоҳияти чексиз: Трамп Путин билан суҳбатини юқори баҳолади

ASTANА. Кazinform — АҚШ президенти Дональд Трамп Россия президенти Владимир Путин билан телефон орқали суҳбатини ижобий баҳолади ҳамда Россия ва Украина ўртасидаги музокаралар “зудлик билан бошланишини” маълум қилди, деб хабар беради Кazinform мухбири.

— Ҳозиргина Россия президенти Владимир Путин билан икки соатлик телефон суҳбатини тугатдим. Айтишим мумкинки, бу суҳбат жуда яхши ўтди. Россия ва Украина зудлик билан ўт очишни тўхтатиш ва энг муҳими, урушни тугатиш бўйича музокараларни бошлайди, — деб ёзди Дональд Трамп Truth Socialда.

АҚШ президентининг таъкидлашича, томонлар музокараларнинг аниқ шартлари бўйича ўзаро келишиб олишади, чунки "улар бошқалар билмайдиган муҳим нарсаларни билишади".

— Ушбу қонли уруш тугаганидан кейин Россия АҚШ билан кенг савдо алоқаларини ривожлантирмоқчи ва мен буни олқишлайман. Россияда қўшимча иш ўринлари яратиш ва халқ фаровонлигини ошириш учун катта имкониятлар мавжуд. Унинг имкониятлари чексиздир. Украина ҳам ўз мамлакатини қайта қурар экан, савдодан катта фойда кўриши мумкин, — деди Трамп.

Дональд Трамп музокаралар зудлик билан бошланишини қайд этиб, бу ҳақда қуйидаги халқаро етакчиларни хабардор қилганини айтди:

• Украина президенти Владимир Зеленский;
• Европа Комиссияси раиси Урсула фон дер Ляйен;
• Франция президенти Эммануэль Макрон;
• Италия бош вазири Жоржа Мелони;
• Германия канцлери Фридрих Мерц;
• Финляндия президенти Александр Стубб.

Шунингдек, Ватикан Рим Папасининг вакиллиги орқали ушбу музокараларга алоҳида қизиқиш билдиргани қайд этилди.

Эслатиб ўтамиз, аввалроқ АҚШ президенти Дональд Трамп душанба куни россиялик ҳамкасби Владимир Путин билан Украинадаги можарога барҳам бериш бўйича музокара ўтказгани ҳақида хабар берган эдик.