Португалия - футзал бўйича Европа чемпиони
Бу йилги қитъа турнирида Португалия ғалаба қозонди. Финалда жамоа Россия билан куч синашди.
Биринчи бўлимда россиялик Антон Соколов 9-дақиқада ва Андрей Афанасьев 12-дақиқада гол урган бўлса, португалиялик Томаш Паку 18-дақиқада гол билан жавоб қайтарди.
Иккинчи бўлимда португалиялик Андре Коэлью 26 ва 31-дақиқаларда иккита гол урган бўлса, 39-дақиқада Пани Барела гол уришга муваффақ бўлди. Шундай қилиб, Португалия Россияни 4:2 ҳисобида мағлуб этди ва қаторасига икки карра Европа чемпиони бўлди. 2018 йилда улар чемпионатнинг олтин медалини ютиб олишган эди.
3-ўрин учун баҳсда Испания Украинани 4:1 ҳисобида мағлуб этди ва бронза медалини қўлга киритди.
Эслатиб ўтамиз, бу йилги қитъа турнирида Қозоғистон терма жамоаси ҳам иштирок этганди. В гуруҳида илк ўйинда Словения билан дуранг ўйнаган қозоғистонликлар (4:4), сўнгра Финляндияни (6:2) ва Италияни 4:1 ҳисобида мағлуб этишди. Натижада 7 очко билан биринчи ўринни эгаллади. Чорак финалда улар Украинага 3:5 ҳисобида имкониятни бой беришди.
Европа чемпионати 1996 йилдан бери мунтазам равишда ўтказиб келинмоқда. Шу кунга қадар Испания - 7, Италия - 2, Россия ва Португалия - 1 марта чемпион бўлишган.
Муаллиф: Адилжан Умбет