Пекинда ШҲТга аъзо давлатларнинг ТИВ вакиллари учрашди
ASTANA. Kazinform – Шанхай ҳамкорлик ташкилоти штаб-квартирасида ШҲТга аъзо давлатлар ташқи ишлар вазирликлари ахборот хизматларининг анъанавий йиллик маслаҳатлашувлари бўлиб ўтди. Бу ҳақда Қозоғистон ТИВ матбуот хизмати хабар берди.
Тадбирда Қозоғистон Республикаси Ташқи ишлар вазирлиги Халқаро ахборот қўмитаси раиси Айбек Смадияров иштирок этди.
Маслаҳатлашувлар чоғида ШҲТ Котибияти ўтган йилдаги ахборот фаолияти натижаларини тақдим этди. Қатнашчилар қўшма лойиҳаларни амалга ошириш тажрибаси билан ўртоқлашиб, расмий ахборотларни эълон қилишда ошкоралик ва тезкорлик муҳимлигини алоҳида таъкидлашди.
А.Смадияров «контентнинг мувофиқлиги ва асосий хабарлар уйғунлиги Ташкилот ичида ишончни мустаҳкамлаш ҳамда халқаро майдонда ягона ахборот майдонини шакллантириш имконини беради», деб таъкидлади. Шунингдек, у Хитой томони ва ШҲТ Котибиятига тадбирни юқори даражада ташкил этгани ҳамда ахборот соҳасида ҳамкорликни кучайтиришга қаратилган конструктив платформа яратгани учун миннатдорчилик билдирди.
Хитой томони ШҲТ доирасидаги амалдаги раислиги доирасидаги медиалоҳиялар ҳақида маълумот бериб, Тяньцзинь шаҳрида бўлиб ўтадиган давлат раҳбарлари саммитини ахборот билан таъминлаш режаси билан таништирди. Учрашувда иштирок этган аъзо давлатларнинг ТИВ ахборот хизматлари раҳбарлари мультимедиа трансляцияларининг янги форматларини жорий этиш ва ШҲТнинг рақамли платформалардаги фаолиятини кучайтириш бўйича таклифлар билдиришди.
Қозоғистонлик дипломат ШҲТ ахборот кун тартибига ёш журналистлар ва блогерларни фаол жалб этиш муҳимлигини таъкидлади. Унинг фикрича, бу аудиторияни кенгайтириш ва Ташкилот фаолиятига ёшлар ўртасида барқарор қизиқиш уйғотишга ёрдам беради.
Шунингдек, ахборот соҳасидаги ўзаро ҳамкорликнинг асосий йўналишлари юзасидан фикр алмашилди. Айниқса, «Шанхай руҳи» тамойилларини биргаликда қўллаб-қувватлаш ва минтақа давлатларида ёлғон ахборотларга қарши курашиш масалаларига алоҳида эътибор қаратилди.
Учрашув якунида қатнашчилар маслаҳатлашувлар баённомасини имзолашди ҳамда бундай форматдаги учрашувлар ташқи сиёсий муҳим воқеаларни ёритишда келишилган ёндашувларни ишлаб чиқиш ва Ташкилотнинг ягона ахборот майдонини мустаҳкамлашда муҳим аҳамиятга эга эканини таъкидлашди.