Париж суди Жерар Депардьени айбдор деб топди

PARIS. Kazinform – Франциялик машҳур актёр Жерар Депардье 2021 йилда фильм суратга олиш пайтида икки аёлга жинсий тегажоқлик қилгани учун айбдор деб топилди, деб хабар беради DW.

13 май куни Парижда бўлиб ўтган суд 76 ёшли актёрни 18 ойлик шартли жазога ҳукм қилди.

Суд Депардьени жинсий тусдаги жиноят содир этган шахслар рўйхатига киритишни ва уни психолог кўригидан ўтишга мажбурлашни буюрди. Ҳукм Депардьенинг иштирокисиз эълон қилинди.

Депардье суд қароридан норози

Прокуратура март ойи охирида Депардьени 18 ойлик шартли жазога ҳукм қилишни, 20 минг евро жарима солишни ва жабрланувчиларга компенсация тўлашни талаб қилган. Шунингдек, уни икки йилгача сайловларда иштирок этиш ҳуқуқидан маҳрум этишни сўраган.

Ҳукм эълон қилинганидан сўнг, актёрнинг адвокати бу қарор устидан шикоят қилиш нияти борлигини билдирди. Депардье ўзининг айбсиз эканини айтиб келмоқда.

Депардьега нисбатан илк суд жараёни

Суд жараёни 24 март куни бошланган. Актёрнинг адвокати Жереми Ассу барча айбловларни инкор этган ва уларни ёлғон деб атаган. Унинг сўзларига кўра, Депардье юрагига операция қилдирган ва қандли диабет билан касалланган.

Суд тайинлаган тиббий мутахассис Депардьенинг судда қатнашишига тўсқинлик йўқлигини айтган, аммо эшитувлар 6 соатдан ошмаслиги, ҳар 15 дақиқада танаффус ва тушлик учун вақтини белгилаш кераклигини таъкидлаган.

Ишга 2021 йилда суратга олинган “Ёшил пардалар” фильмидаги воқеа сабаб бўлган. 54 ёшли декоратор ва 34 ёшли режиссёр ёрдамчиси Депардьени қўпол сўзлар айтгани ва таналарига теггани – кўкрак, бўксалар ва жинсий аъзоларга қўл текизгани учун айблаган.

Улар 2024 йил бошида судга жинсий зўравонлик, тегажоқлик ва аёлларни камситувчи ҳақоратлар бўйича даъво аризасини топширган.

Жерар Депардье 200 дан ортиқ фильмда рол ўйнаган ва у аввал ҳам бир неча бор жинсий зўравонликда айбланган. 2023 йил апрель ойида яна 13 нафар аёл — актрисалар, эпизодчи ролларда иштирок этганлар ва гримёрлар — унинг ноқулай хулқлари ҳақида баёнот берган. Аммо бу — Депардьега қарши судгача етган биринчи ишдир.

Бунгача Парижда Жерар Депардьега қарши суд жараёни давом этаётгани ҳақида ёзган эдик.