Осмондан тушган гуманитар ёрдам Ғазо секторида 5 кишининг ҳаётига зомин бўлди

АҚШ ва Иордания фаластинликларнинг ўлимига сабаб бўлган инсонпарварлик ёрдами билан боғлиқ ҳодисага алоқадорлигини инкор этмоқда, деб хабар беради Kazinform агентлиги DW нашрига таяниб.

Ғазо секторига 8 март, жума куни инсонпарварлик ёрдамининг ҳаводан тушиши оқибатида беш киши ҳалок бўлди, яна 11 киши жароҳатланди. Бу ҳақда Американинг CBS News телеканали маҳаллий ХАМАС назоратидаги Соғлиқни сақлаш вазирлиги ва воқеа гувоҳига таяниб хабар берди.

АҚШ ва Иордания ҳалокат учун жавобгарликни рад этади

8 март, жума куни АҚШ, Иордания, Миср, Франция, Нидерландия ва Бельгия Ғазо сектори устидан гуманитар ёрдамни ташлаб юборди. Америкалик мудофаа вазирлиги расмийси CBS телеканалига берган интервьюсида айтишича, дастлабки таҳлиллар бўйича, Америка самолёти ердаги ўлимлар учун жавобгар эмас, бироқ тергов давом этиши керак. Унинг сўзларига кўра, ҳарбийлар инсонпарварлик юклари бўлган барча қутилар одатдагидек қўнганлиги ҳақидаги тасдиқнома олган.

Иордания расмийлари ҳам воқеага алоқаси йўқлигини айтмоқда. Мамлакат давлат ахборот агентлигининг хабар беришича, иштирок этган самолётларнинг бирортасида ҳам техник носозлик йўқ.

Байден Ғазо секторида гуманитар порт қурилишини эълон қилди

7 март, пайшанба куни АҚШ президенти Жо Байден халққа мурожаати чоғида Ғазо секторида у ерга гуманитар юкларни етказиб бериш учун вақтинчалик порт ташкил этилишини маълум қилди.

Исроил Ташқи ишлар вазирлиги матбуот котиби Лиор Ҳаят мамлакат режани олқишлашини айтди. Унинг сўзларига кўра, бу “Исроил стандартларига мувофиқ хавфсизлик текширувлари ўтказилгандан кейин Ғазо секторига инсонпарварлик ёрдамини кўпайтириш имконини беради”. Шунингдек, у Исроил ХАМАС террор ташкилоти бутунлай йўқ қилинмагунча ва барча гаровга олинганлар қайтарилмагунча унга қарши курашни давом эттиришини қўшимча қилди.